DILI, 15 Outubru 2025 (TATOLI)—Grupu deskoñesidu baku Padre Juvinal Gusmão iha Aldeia Mukububo, Suku Lakuliu, Postu Administrativu Kelikai.
Kazu ne’e akontese iha Domingu, 12 Outubru, purvolta tuku 05:00 Otl bainhira vítima fila husi vizita família iha Aldeia Ossolia, Suku Letemumu ho motorizada marka Beat.
“Sira tebe de’it maibé la monu no hafoin Amu deklara dehan nia Amu ne’e mak ema hirak-ne’e retira,” reprezentante vítima, Estevão Gusmão hateten liuhosi komunikadu imprensa ne’ebé TATOLI asesu, Kuarta ne’e.
Estevão haktuir Padre Juvinal Gusmão foin ordenadu saserdotál husi Bispu Dioseze Baukau, Don Leandro Maria Alves iha Igreja Parókia Santa Terezinha Kelikai, iha 01 Outubru liubá no simu kargu nu’udár Virgílio iha Igreja Parókia Kristu Rei Lautein.
Hafoin simu ordenasaun, Padre Juvinal Gusmão sei hala’o vizita ba família sira no tuir planu iha loron akontesimentu sei dezkola ba Lautein hodi kontinua hala’o kna’ar iha Igreja Parokia Kristu Rei.
“Hafoin hetan baku, Padre mós informa kedas ba polísia no kontinua viajen ba Lautein tanba iha-ne’ebá mós programa preparadu ona,” Estevão konta.
Nia salienta, tuir informasaun husi vítima Padre Juvinal Gusmão, suspeitu ne’ebé halo agregasaun fízika la utiliza arma branka, maibé ho asaun fiziku hodi rezulta vítima sofre bubu iha kabaas parte loos tanba tebe husi kotuk.
Família vítima solisita parte seguransa atu prosesa kazu referidu para autór responsabiliza ba sira nia hahalok tanba konsideradu aktu ne’e estraga imajen sarani Kelikai inklui Igreja Katólika iha Timor-Leste.
Jornalista: Natalino Belo
Editór: Xisto Freitas da Piedade
