BOBONARU, 20 Outubru 2025 (TATOLI) – Grupu Haki’ak manu Mareko ne’ebé hetan apoiu husi Ministériu Dezembolvimentu Rurál no Abitasaun Komunitária, iha aldeia Tunubibi, suku Tapo-Memu, Postu Administrativu Maliana, Munisípiu Bobonaru daudaun ne’e la halo atividade ka paradu hela tanba laiha ona orsamentu.
Membru Grupu Lali’a Girál, Leonio Heneriques, konfirma atividade parada tanba manu Mareko ne’ebé sira haki’ak hamutuk 1000-resin ne’e mate ho hamlaha kauza husi hahan laiha.
“Momentu ne’ebá manu mate haat, lima kada-loron tanba osan laiha ona atu sosa hahan. Ami lahatene ami-nia osan ne’e hotu tanba ami lahatene relatóriu husi CDA osan sai ne’e hira no tama ne’e hira. Ha’u sente ladun kontente uituan ho atividade grupu ida-ne’e. Ha’u la kontente kona-ba jerente sira ne’ebé jere osan grupu ida-ne’e,” nia informa ba Jornalista sira iha terrenu foin lalais, ne’e.
Leonio husu ba parte relevante atu halo auditoria ba Sentru Dezenvolvimentu Aldeia (CDA sigla Portugés) ne’ebé durante ne’e jere fundu ne’ebé apoia ba grupu tanba suspeitadu ezekuta orsamentu la tuir matadalan.
“Iha ne’e ami haki’ak manu mosu tan kolam ikan. Momentu ne’ebá ministru husu, kolam ne’e imi ke’e foti osan husi ne’ebé? Ha’u dehan, ami utiliza hela osan ida Manu nian ne’e hodi ke’e tan kolam ne’e. Depois ministru dehan ne’e labele tanba osan ne’e mai los ba manu de’it, se imi ke’e tan kolam to’o klaran imi bele monu, mas osan ne’e sira uza komu haree iha liman barak, entaun sira halo saida de’it komforme. Sira sosa materiál la dehan ami, mai materiál balun estraga de’it – la uza, rai hela ne’e,” nia haktuir.
Xefe Grupu Lali’a Girál, Paul Fernando Loe, reforsa, atividade haki’ak manu labele kontinua ba faze daruak nian tanba faze dahuluk ne’e konsege kolleta de’it manu 200-resin husi totál manu 1000-resin.
Paul Fernando Loe énfaze, daudaun ne’e manu-luhan mamuk no membru grupu mós fahe malu tanba laiha ona atividade, no situasaun ne’e akontese tanba durante ne’e CDA laiha koordenasaun di’ak ho grupu.
Notísia relevante: https://tatoli.tl/2025/06/20/vise-ministru-observa-grupu-hakiak-manu-ikan-no-karau-iha-passabe/
“Sira Sentru Dezenvolvimentu Aldeia la konsidera ami grupu. Sira la’o mesak-mesak, la’o tiha nune’e sai iha problema barak mak akontese. Momentu ne’ebá ami husu relatóriu osan, sira nunka atu fó hatene, nunka mais atu enkontru ho ami grupu. Sira la’o mesak-mesak. Osan ne’e sira jere rasik, ikusmai hasoru problema, osan laiha, manu mate hamlaha, ikusmai rezultadu laiha. Totál manu 1000 liu maibé ami kolleta ne’e 200 liu de’it,” nia akresenta.
Paulo Fernando Loe, haktuir katak problema ne’e grupu hato’o ona ba Ministériu kompente liuhusi enkontru ho parte finansas no relata bebeik ba funsionariu destakadu maibé to’o ohin loron laiha rezultádu.
Xefe grupu ne’e mós prefere loke auditoria tanba to’o agora grupu lahatene relatóriu ezekusaun.
“Ami ezije atu hato’o relatóriu kona-ba osan maibé sira CDA la hato’o. Relatóriu kona-ba osan ne’e sira fó de’it ba nasionál mas lahatene to’o ohin loron, relatoriu ne’e ha’u xefe grupu mós la asina, tanba ami grupu lahtene osan ne’e mai hira, sai ne’e hira? Ami hatene de’it mak osan rihun $40 maibé osan nia isin-lolon ne’e ami lahatene ida. Osan ne’e sira CDA mak jere la konsidera ami grupu sira halo tuir sira-nia hakarak de’it,” nia lamenta.
Enkuantu Jornalista sira tenta halo konfirmasaun ho CDA atuál Xefe aldeia Tunubibi maibé rejeita fó komentáriu.
Observasaun Tatoli iha terrenu mós nota katak manu-luhan mamuk no la rona manu Mareko nia lian hanesan bai-bain.
Enkuantu fundu ne’ebé MDRHC apoia hamutuk rihun $40 ba grupu rua hanesan Hul-Topol no Lali’a Giral hodi halo atividade haki’ak manu Mareko.
Notisía relevante: https://tatoli.tl/2025/04/16/benefisiariu-sira-iha-tunubibi-haksolok-ho-programa-uma-dignu-ba-povu/
Jornalista: Sergio da Cruz
Editór: Rafael Ximenes de A. Belo
