Expedito apela ba jornalista sira uza kartaun identidade bainhira halo kobertura
DILI, 21 Outubru 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes apela ba jornalista sira uza kartaun identidade bainhira halo kobertura iha terrenu.
“Ha’u apela ba jornalista sira hotu iha mídia konvensionál no plataforma sira-ne’ebé rejistu ona iha Konsellu Imprensa, favór ida kuandu halo imi-nia atividade kobertura iha sosiedade liga atividade serimónia Estadu nian no atividade polítika tenke uza identidade ofisiál ne’ebé Konsellu Imprensa atribui,” Loro Dias dehan ba jornalista sira iha salaun UNITAL, Bekora, Dili, Tersa ne’e.
Nia esplika jornalista sira livre entrevista sé de’it iha terrenu maibé importante mak uza identidade ofisiál hosi mídia ida nian.
“Ita-nia liberdade ne’e tenke balansu ho resposabilidade. Tanba ne’e mak uza kartaun identidade hodi halo kobertura. Maibé, keta haluha bainhira prodús notísia tenke iha responsabilidade,” governante ne’e fó-hanoin.
Tuir Sekretáriu Estadu katak Parlamentu Nasionál (PN) mós preokupa ho jornalista sira-ne’ebé halo kobertura maibé la uza kartaun identidade.
“Horisehik ami iha Parlamentu Nasionál mak sira (membru PN) dehan. Se imi (jornalista) la tara kartaun identidade mak membru Parlamentu Nasionál sei la ko’alia ho imi,” nia haktuir.
Jornalista: Osória Marques
Editór: Xisto Freitas da Piedade
