VIKEKE, 21 Outubru 2025 (TATOLI)—Polísia Nasionál Timor-Leste (PNTL) Munisípiu Vikeke estabelese ona Konsellu Seguransa Komunitária (KPK) iha Suku Makadike Uaitame, Postu Administrativu Uatulari, Munisípiu Vikeke.
Xefe Suku Makadike Uaitame, José Pinto Soares haktuir PNTL estabelese KPK iha Suku Makadike Uaitame ne’ebé lokaliza iha foho Matebian nune’e liuhusi KPK ida-ne’e bele fó apoia seguransa ba PNTL hodi asegura establidade iha suku laran.
“Tan ne’e, molok estabelese KPK ekipa PNTL Munisípiu Vikeke iha semana kotuk sira fó formasaun kona-ba KPK nian ba konsellu suku nian. Depoiz formasaun hotu sira fó ona pose ba ita-nia konsellu suku sira. Nune’e, liuhusi KPK bele apoia ba ita-nia seguransa sira iha baze,” Xefe Suku Makadike Uaitame ba TATOLI iha Postu Uatulari, Tersa ne’e.
Notísia relevante: https://tatoli.tl/2025/08/04/autoridade-afaloikai-husu-komjer-pntl-oferese-formasaun-ba-membru-kpk/
José esplika, envolvimentu KPK ih Suku Makadike Uaitme ne’ebé simu ona tomada pose ne’e hamutuk na’in-38 kompostu husi xefe suku, xefe aldeia, juventude feto, mane no veteranu sira.
“Membru KPK ne’e kompostu husi ami konsellu suku no veteranu sira, ami-nia dever mak apoiu seguransa. Tanba ami suku iha liu área remota ne’e presiza tebes seguransa. Distánsia husi ami-nia suku ba eskuadra PNTL ne’e dook tebes, entaun liuhusi KPK ne’e bele fó apoiu ba seguransa,” nia subliña.
Tuir dadus, Suku Makadike Uaitame iha aldeia neen mak hanesan Aldeia Bubulita, Brubai, Digamasi, Luruboru, Matadalan no Keturai, ho totál uma-kain 200 no totál abitante hamutuk 686.
Jornalista: Vitorino Lopes da Costa
Editór: Xisto Freitas da Piedade
