Pesoál Veterináriu Vikeke na’in-14 simu ona vasina kontra vírus raiva doze dahuluk
VIKEKE, 07 Novembru 2025 (TATOLI)—Xefe Departamentu Veterináriu Servisu Ministériu Agrikultura Peska, Pekuária no Floresta (SMAPPF) Munisípiu Vikeke, Domingos do Carmo Pinto, informa pesoál veterináriu hamutuk na’in-14 simu vasina kontra vírus raiva molok fó vasina ba komunidade nia balada (asu) iha Munisípiu Vikeke.
“Kona-ba vasina ami pesoál veterináriu hamutuk na’in-15, maibé na’in-ida (1) kondisaun moras. Nune’e, iha fulan kotuk (Outubru) ami na’in-14 mak simu ona vasina kontra rabies (raiva) nian ba doze dahuluk no iha 12 fulan-Novembru ami kompleta doze daruak hotu, hafoin ami bele fó vasina ba komunidade nia asu,” Domingos dehan ba TATOLI iha Postu Vikeke Vila, Sesta ne’e.
Domingos hatutan, vasina doze daruak ba pesoál veterináriu hotu mak hahú prepara fó vasina ba komunidade nia asu sira iha Munisípiu Vikeke ba prevensaun vírus rabies.
“Planu vasinasaun ba asu sira-ne’e ami hahú husi Postu Lakluta, depoiz hotu mak ba tan postu seluk to’o asu sira-ne’e vasina hotu mak foin para. Ai-moruk vasinasaun ba kontra vírus rabies daudaun ne’e sei iha Dili, ami simu tiha vasinasaun daruak hotu hafoin ekipa nasionál lori mai Munisípiu Vikeke,” nia hato’o.
Notísia relevante: Janeiru-Setembru, asu tata ema na’in-58 la indika raiva
Nune’e, nia dehan, bainhira vasina hotu parte servisu veterináriu Munisípiu Vikeke sei halo karta koñesimentu ba autoridade munisipál, postu no suku sira. Maibé, transporte mak sai difikuldade ba pesoál veterináriu tanba karreta laiha.
“Karreta mak sei difikulta ami, binhira ami hala’o programa vasina asu. Nune’e, ami koordena ho autoridade munisipál hodi apoia tranporte ba ami para ba fó vasina. Karik la oferese karreta pasiénsia ami ho ami-nia motorizada privada mak sei bá postu,” nia akresenta.
Entretantu, pesoál veterináriu hamutuk na’in-14 mak sei fó vasina ba komunidade nia asu hodi kontra vírus rabies ne’ebé daudaun ne’e rejista iha Timor-Leste.
Jornalista: Vitorino Lopes da Costa
Editór: Xisto Freitas da Piedade
