OEKUSI, 11 Novembru 2025 (TATOLI) – Polísia Nasionál Timor-Leste (PNTL) liuhusi Unidade Patrullamentu Fronteira (UPF) liderada Komandante UPF Superentendente Xefe Polísia, Euclides Belo hamutuk ho Tentara Nasional Indonesia Angkatan Darat (TNI-AD), liuhusi Satuan Tugas Penyamanan Perbatasan (Satgas-Pamtas) sektor barat liderada Komandante Satgas-Pamtas Letnan Kolonel, Arh Endis Fahrul Rizal, tersa ne’e, hala’o patrullamentu koordenasaun hodi garante seguransa iha liña fronteira Wini-Sakato suku Nípani sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Notísia relevante:UPF-TNI organiza patrullamentu iha fronteira Tapo-Memo no Delomil
Komandante UPF Superentendente Xefe Polísia, Euclides Belo, informa katak, patrullamentu koordenada ne’e ho nia objetivu prinsipál tolu, atu hametin lasu amizade, observa kondisaun pilár sira iha liña fronteira inklui diskute planu atividade ba futuru.
Komandante Belo esplika, objetivu primeiru husi patrullamentu koordenada ne’e, atu hametin relasaun serbisu entre TNI ho UPF iha liña fronteira, nune’e bele hamosu sinerjia serbisu entre seguransa liña fronteira tantu TNI no mós UPF.
Objetivu daruak, hodi haree no observa kondisaun pilár sira iha fronteira entre Timor-Leste ho Indonézia, maibé iha kondisaun di’ak tantu pilár no kuadru aviza sira-ne’ebé destaka iha liña fronteira área Sakato-Wini nian.
Objetivu datolu, liuhusi sorumutu ofisiál ne’e, bele hamosu ideia planu ba futuru, liu-liu promove desportu amizade, atividade sosiál sira seluk inklui planu patrullamentu koordenada ba liña fronteira sira iha Oésilo, Pássabe inklui Nítibe.
“Ami espera katak ho relasaun ne’ebé ohin ami hala’o ne’e, bele garante ita-nia sidadaun sira iha liña fronteira katak, autoridade seguransa ne’e, la’os de’it kumpre nia misaun parselár maibé fokuliu ba garante seguransa, nune’e komunidade sira iha liña fronteira tenki kumpre regra nasaun nian, labele viola regra, kuandu iha nesesidade kultura no sosiál ruma, presiza koordena ho UPF no TNI atu iha koordenasaun ba malu, labele buka dalan ketak-ketak, depois kuandu mosu resiku ruma, presiza informa ba malu, tanba misaun seguransa rua ne’e prontu oras 24 atu garante seguransa iha liña fronteira sira,” nia hateten iha liña fronteira Sakato, ohin.
Notísia relevante:Abitante Bene-Ufe rekomenda MI harii postu provizóriu ba UPF iha Naktuka
Komandante Satgas-Pamtas Letnan Kolonel, Arh Endis Fahrul Rizal, konsidera patrullamentu koordenada ne’e, importante hodi mantein salvaguarda sira iha liña fronteira.
“Ohin, ami hala’o hela patrullamentu konjunta ho UPF hodi salvaguarda fronteira, mantein maun-alin, no mantein komunikasaun ne’ebé di’ak. Ami hanesan maun-alin, hala’o ami-nia knaar hodi mantein seguransa iha kada rejiaun liuhusi ami-nia patrullamentu konjunta sira, tanba ne’e importante tebes tanba liu husi ami nia patrullamentu konjunta, ami bele halo sinerjia no kolabora, kompriende fronteira ne’ebé dezignadu, atu nune’e atividade ilegál labele akontese iha fronteira,” nia hateten.
Notísia relevante:UPF ho Satgas-Pamtas halo patrullamentu koordenasaun iha Naktuka
Entretantu, totál pilár sira iha sektor barat entre Timor-Leste ho Indonézia ne’ebé hahú husi fronteira Wini-Sakato, Oésilo no Pássabe to’o Naktuka-Oépoli hamutuk 585.
Jornalista: Abílio Elo Nini
Editór: Rafael Ximenes de A. Belo
