KOVALIMA, 13 Novembru 2025 (TATOLI)-Organizasaun Noun Govermentál hosi Fundasaun Alola aprezenta programa prinsipal hamutuk lima (5) hodi implementa iha postu administrativu Zumalai, munisípiu Kovalima.
Programa prinsinpal lima ne’e maka baseline survey, inaugurasaun grupu, formasaun fó hahán optimal ba bebe no labarik kiik, nutritional screening, promosaun saúde liuhosi demotrasaun tein ai-han lokál.
Koordenadór Programa Inan no Oan Fundasaun Alola, Moises da Silva hateten, programa ne’e ho ninia objetivu maka atu hasa’e komunidade sira-nia koñesementu kona-ba oinsá atu fó importánsia ba inan no bebe nia saúde ho ninia vizaun inan no oan moris saudavel iha Timor-Leste.
“Ami-nia atividade ne’ebé maka implementa alvu ba inan isin rua, inan fó susu no ba labarik ho idade 0-59 programa ne’e hakarak konsulta durante inan isin-rua partu iha fasilidade saúde, inan fó susu de’it susu been inan (SBIN) fulan neen no kontinua to’o tinan 2 no labarik fulan 6-23 no 24-59 tetu fulan-fulan no sukat,”nia hateten bainhira aprezenta planu ne’e ba ONG no Organizasaun Komunitária sira iha salaun AMC Kovalima, ohin.
Programa baseline survey ne’e atu fahe informasaun ba komunidade sira atu oinsá fó hahán saudavél no nutritivu ba bebe no labarik sira bainhira inan isin-rua to’o partu hodi prevene mortalidade inan no oan iha Timor-Leste.
Tuir ajenda atividade baseline Survey iha postu Administrativu Zumalai sei implementa iha suku Lour, Zulo no Fatuleto ho membru 45, pendente iha labotaróriu 237 no inan isin-rua 25.
Jornalista: Celestina Teles
Editór : Florencio Miranda Ximenes
