DILI, 13 Novembru 2025 (TATOLI)–Ekipa Kulugisa Football Club (FC) kontinua sofre golu barak durante partisipa iha kompetisaun primeira divizaun Liga Futeból Femininu Timor-Leste (LFFTL).
Ekipa Femininu husi Munisípiu Baukau ne’e to’o jornada dahaat sofre ona menus golu hamutuk 52 ne’ebé antes derrota husi S’amuser FC 24-0 iha jornada datoluk. Iha jornada daruak derrota ho Akadémika 4-0, jornada dahuluk lakon ho VDL FC 4-0 no jornada dahaat sofre tan golu 18 husi Buibere FC.
Treinadór Kulugisa FC, Domingos Soares hateten situasaun referida nia parte simu realidade tanba ekipa husi Baukau falta jogadora ne’ebé esperiénsia tanba maioria foin rekruta iha kampu futsál no mesak estudante universitária.
“Hau-nia jogadora sira foin mak tun kampu. Ita laiha jogadora selesaun no menus esperiénsia, tanba ne’e derrota ho skor boot,” Treinadór Kulugisa FC hateten iha Estádiu Munisipál Dili, Kinta ne’e.
Notísia relevante: Buibere FC dere Kulugisa 18-0
Aleinde ne’e, jogadora balun husi Kulugisa FC reforsa hika’as ekipa seluk hanesan S’amuser, Buibere, Maudoko no seluk tan nune’e afeta ba kualidade ekipa.
Mezmu nune’e, nia kompromete sei hadi’a di’ak liután jogu nune’e jogu sira tuirmai bele redús golu no rekolla pontu hodi mantein iha primeira divizaun LFFTL.
“Ita sei rekruta jogadora iha volta daruak mai nune’e labele degrada ba segunda divizaun,” Domingos Soares akresenta.
Entretantu, Kulugisa FC rasik atualmente iha pozisaun ikus, dasanuluk, iha tabela klasifikasaun primeira divizaun LFFTL ho pontu 0 husi jogu haat (4) no produtividade golu -52.
Jornalista: Natalino Belo
Editór: Xisto Freitas da Piedade
