ME notifika ona kontratór ba projetu CAFE Likisá no Ainaru
DILI, 17 Novembru 2025 (TATOLI)—Ministériu Edukasaun (ME) liuhusi Diresaun Aprovizionamentu notifika ona kontratór rua ba projetu konstrusaun eskola Centros de Aprendizagem e Formação Escolar (CAFE) Likisá no Ainaru.
“Kona-ba obra rua ne’e diresaun aprovizionamentu fó ona notifikasaun ba kontratór ne’ebé responsabiliza no nia prosesu dudaun ne’e iha Ajénsia Dezenvovimentu Nasionál (ADN) ona,” Diretór Nasionál Infraestutura Edukativa Ministériu Edukasaun (ME), Hélio Lopes dehan ba TATOLI iha nia kna’ar fatin, Vila Verde, Dili, Segunda ne’e.
Nia dehan ADN halo re-verifikasaun ona dokumentu ba kustu ne’ebé sei lori ba prosesu aprovizionamentu foun bainhira dokumentu verifikadu ona hosi ADN.
Konstrusaun Eskola CAFE Ainaru kaer husi Empreza Romana Junior Unip. Lda no konstrusaun Eskola CAFE Likisá kaer husi Empreza RICS Unip. Lda. Konstrusaun eskola CAFE Ainaru hetan alokasaun $907.735,20. Konstrusaun ne’e hahú iha 2022. Enkuantu, konstrusaun eskola CAFE Likisá hamutuk $692.517,12. Konstrusaun obra ne’e hahú iha 2020.
Entretantu, Diretór Servisu Edukasaun Munisípiu Ainaru, Patrício da Costa Magno, informa kontrusaun eskola CAFE iha Ainaru ne’e paradu no ME liuhusi infraestrutura halo ona xamada daruak ba kompañia, tanba la kontinua servisu.
“Ami informa no rekomenda ona ba Ministériu Edukasaun iha fulan-Janeiru liubá katak loke fali konkursu para konstrusaun ne’e bele kontinua la’o,” nia haktuir.
Tuir dirijente kompañia, ninia kapasidade limitada atu kaer obra ho orsamentu neʼebé boot. Tanba ne’e, konstrusaun foin atinje pursentu 15. “Ida 15% ne’e osan fó ona maibé nia la kontinua entaun la transfere osan ona,” nia tenik.
Konstrusaun eskola CAFE Likisá ne’e seidauk atinje 50%.
Jornalista: Osória Marques
Editór: Xisto Freitas da Piedade
