DILI, 22 Novembru 2025 (TATOLI) – Governu liuhusi reuniaun Konsellu Ministru estra-ordinária, sábadu ohin, fó poder ba Ministra Solodaridade Sosiál no Inkluzaun (MSSI), Verónica das Dores, atu asina akordu Administrativu Konvensaun Multilaterál Seguransa Sosiál Komunidade Nasaun Ko’alia Lian Portugés (CPLP, sigla Portugés,) iha Kabu-Verde.
“Konsellu Ministru delibera hodi fó podér tomak ba Ministra Solidariedade Sosiál no Inkluzaun, Verónica das Dores, hodi lori Repúblika Demokrátika Timor-Leste nia naran asina akordu Administrativu hodi aplika ba Konvensaun Multilaterál Seguransa Sosiál Komunidade (CPLP) nian”, refere Komunikadu ne’ebé Tatoli asesu, ohin.
Komunikadu sita katak akordu administrativu ida-ne’e, tuir planu sei asina iha loron 03 fulan-Dezembru tinan-2025, iha Kabo-Verde, estabelese prosedimentu operasionál sira ne’ebé nesesáriu ba implementasaun Konvensaun Multilaterál Seguransa Sosiál CPLP nian.
Konvensaun ne’e ho objetivu atu promove espansaun kobertura protesaun sosiál atu bele garante portabilidade direitu sosiál ba sidadaun sira ne’ebé hela iha país oioin komunidade nian no reprezenta marka signifikativu ida iha konstrusaun sidadania entre povu sira Komunidade nian, no fó benefísiu ne’ebé reál no konkretu ba sidadaun sira.
Jornalista: Natalino Costa
Editór: Rafael Ximenes de A. Belo
