MAE entrega motorizada 20 ba suku sanulu iha Munisípiu Baukau-Ermera-Manufahi-Vikeke
DILI, 24 Novembru 2025 (TATOLI)—Governu liuhusi Ministériu Administrasaun Estatál (MAE), Segunda ne’e, entrega motorizada 20 ho marka Honda Versa sanulu (10) no Revo Fit sanulu (10) ba suku foun sanulu (10) iha Munisípiu Baukau, Ermera, Manufahi no Vikeke.
“Kada suku sei simu motór rua hodi halo servisu to’o aldeia no motór ida tan ba sekretariadu hodi halo servisu administrasaun nian iha suku,” Ministru Administrasaun Estatál, Tomás dos Rosário Cabral ba jornalista sira hafoin entrega motorizada iha resintu MAE, Kolmera, Dili.
Ministru apela ba xefe suku sira katak tenke utiliza motorizada referida hodi halo servisu administrasaun suku nian ho didi’ak.
Suku sanulu ne’ebé simu motorizada mak Suku Tekinomata iha Postu Administrativu Laga, Munisípiu Baukau, Suku Builai ho Suku Kaibada, Postu Administrativu Baukau Vila, Suku Asulau iha Postu Administrativu Letefoho, Munisípiu Ermera, Suku Koliate-Leten, Postu Hatolia A, Suku Poetete Vila, Postu Ermera, Suku Poetete Loduduke iha Emera, Suku Tahuben, Postu Alas, Munisípiu Manufahi, Suku Makadiki Uaitame, Postu Uatulari no Suku Makadiki de Baixo iha Munisípiu Vikeke.
Enkuantu, suku haat hanesan Suku Karahili no Rairako Suku Aileu, Suku Manemeko, Kutete, husi Oekusi sei iha hela prosesu nia laran.
Xefe Suku Builai, Postu Administrativu Baukau Vila, Munisípiu Baukau, Juvinal Feliciano da Costa, agradese ba Governu tanba ajuda ona motorizada ba suku hodi halo servisu administrasaun suku nian.
Motorizada 20 ne’e Empreza JDelteti MZ33 Unipesoal, Lda mak hatama. Totál osan ne’ebé sosa hamutuk $37.900.
Xefe suku balun la tuir reuniaun KKM
Iha parte seluk, Ministru Administrasaun Estatál (MAE), Tomás do Rosário Cabral, preokupa ho xefe suku ne’ebé la tuir reuniaun Konsellu Konsultivu Munisipál (KKM) ne’ebé realiza kada tinan ida dala rua hodi deside prioridade suku sira-nian.
“Ha’u simu relatóriu kona-ba reuniaun Konsellu Konsultivu ne’ebé Xefe Suku balun la marka prezensa. Ha’u rona iha munisípiu balun koordenasaun susar uitoan no iha munisípiu balun xefe suku balun la tuir reuniaun Konsellu Konsultivu Munisipál ne’ebé atu deside prioridade,” nia haktuir iha ámbitu distribuisaun motorizada ba suku sanulu.
Ministru Cabral dehan sansaun ne’ebé sei fó ba xefe suku sira mak sei la fó Programa Nasionál Dezenvolvimentu Suku (PNDS) tanba atu bá diskute programa importante mak la partisipa ne’e oinsá deside programa iha suku sira.
Iha fatin hanesan, Prezidente Autoridade Munisípiu Lautein, Melio de Jesus rekoñese xefe suku balun la tuir reuniaun Konsellu Konsultivu Munisipál.
Nia dehan Konsellu Konsultivu mak sei fó apresiasaun ba planu asaun anuál ne’ebé trasa kada tinan ne’ebé planu sira maihosi suku sira mak bá munisipál.
“Bainhira reuniaun Konsellu Konsultivu ne’e ha’u apela kedas ba membru suku. Kuandu ida-ne’ebé mak la marka prezensa mak ha’u sei fó toma-atensaun, no la muda mak Programa Nasionál Dezenvolvimentu Suku (PNDS) iha suku referidu ne’e sei la lori bá ne’ebá. Ida-ne’e nu’udár sansaun ida,” nia realsa.
Jornalista: Osória Marques
Editór: Xisto Freitas da Piedade
