DILI, 09 Dezembru 2025 (TATOLI) — Autralian Federal Police (AFP) ho Governu liuhusi Ministériu Interiór, hahú deskute prevensaun no kombate hasoru krime organizadu no jogu online sira iha territóriu Timor-Leste.
Komisáriu Adjuntu Krime husi Australian Federal Police (AFP) Ian McCartney, informa AFP kompromete apoia PNTL no Polísia Sientífika Investigasaun Kriminál (PCIC, sigla portugés) atubele kombate krime rede organizadu no jogu online ilegál iha Timor-Leste.
“Ha’u mai halo vizita ida iha Timor-Leste hasoru malu ho Ministru Interiór hodi apresia nível kooperasaun kolaborasaun entre ajénsia Timor- Leste ho Austrália, hodi hatudu kooperasaun bilateral,” Ian McCartney hateten.
Nia dehan, vizita ida-ne’e importante atubele hetan konkordánsia entendimentu di’ak ida, tanba rejionál evolusaun iha rejiaun ne’e hatudu katak, ita hotu-hotu hasoru desafiu ne’ebé mak maka’as iha krime organizador ho buat sira seluk.
“Enkontru ida-ne’e mantein kooperasaun ne’ebé forte hodi bele hasoru dezafiu sira, nune’e Embaixada Austrália iha Timor-Leste kolabora di’ak ho Governu Timor-Leste hodi apoiu maka’as intermu politika, téknika no parte seguransa,” nia katak.
Nune’e mós, Embaixadora Austrália mai Timor-Leste, Caitlin Wilson, hatutan vizita ida ne’e hatudu komitmentu kolaborasaun di’ak ne’ebe maka Governu Austrália ho Timor-Leste inklui relasaun espesiál ho Ministériu Interiór.
“Entaun enkontru ida-ne’e, ba oin oinsá hodi reforsa órgaun polísia kriminál sira, halo nusá mak bele hala’o servisu di’ak, entaun vizita atu hatudu komitmentu hosi AFP no TLPD hodi kombate krime organizado no tráfiku umanu inklui mós krime jogu online sira,” nia afirma.
Ministru Interiór Francisco da Costa Guterres hateten, sorumutu ne’e oinsá Austrália nia apoia ba Polísia Nasionál Timor-Leste no Polísia Sientífika Investigasaun Kriminál (PCIC) atubele kombate krime rede organizador no jogu online ilegál.
“Ami diskute hela kona-ba oinsá Austrália ninia apoiu ba iha krime organizadu sira ou krime transnasionál sira, ne’ebé agora servisu daudaun, imi hatene ona katak, foin lalais ita konsege desmantela rede balu, mas ita tenke kontinua atensaun nafatin ba rede sira-ne’e”, nia informa.
Ministru ne’e hatutan, atu kombate krime organizadu sira, liuliu jogu online ne’e, di’ak ida ba orgaun polísia kriminál ne’e, tanba governu hasai tiha rezolusaun ida kona-ba taka tiha jogu online ilegál sira-ne’e.
Nia esplika, rezolusaun governu hodi taka jogu online ne’e, promove hosi Ministériu Turismu no Ambiente hodi propoin ba Primeiru Ministru, depois aprova iha Konsellu Ministru iha fulan hirak liubá iha tinan ida-ne’e.
Nune’e, nia konsidera katak, rezolusaun governu ne’e kapaas tebes hodi sai hanesan baze PNTL liuhusi Diresaun Servisu Investigasaun Kriminál sira hodi halo atuasaun buka tuir autór sira ne’ebé mak kria jogu oiline.
“Ita sei la’o nafatin buka tuir autór ba jogu online sira, ita foin hetan balu, balu ita kontinua la’o, ita kontinua vijilante no kontinua atentu depois sé de’it mak iha intensaun aat atu hakarak viola regra ne’ebe mak iha, hakarak ka lakohi tenki hatán ba iha tribunal,” nia fundamenta.
Nia dehan, iha enkontru ne’e, diskute hamutuk ho Austrália no promete sei ajuda Timor-Leste atu elava kapasidade investigadór sira hosi órgaun polísia kriminál nian.
“Oinsá atu deteta informasaun sira, iha servisu informasaun no sira mós promete iha ekipamentu balun sei apoiu hodi ajuda deteta jogu online ilegál sira,” Ministru Interiór hateten.
Notísia relevante: Austrália apoia CCTV ba PNTL kontrola problema iha Dili laran
Jornalista: Natalino Costa
Editór: Evaristo Soares Martins
