MESSK aprova lista estudante finalista ISJB-ISC-UNDIL atu gradua iha 2025
DILI, 13 Dezembru 2025 (TATOLI)—Ministru Ensinu Superiór Siénsia no Kultura (MESSK), José Honório da Costa Pereira Jerónimo, aprova ona lista estudante finalista Institutu São João de Brito (ISJB), Institutu Superiór Kristál (ISC) no UNiversidade Dili (UNDIL) ne’ebé atu gradua iha 2025.
“Ha’u aprova ona lista estudante finalista ne’ebé atu simu graduasaun iha tinan ne’e mak husi Institutu São João de Brito, Institutu Superiór Kristál, Universidade Dili,” Ministru Honório dehan jornalista sira, iha resintu Ministériu Negósiu Estranjeiru no Kooperasaun (MNEK), ohin.
Nia dehan, estudante finalista nia naran tenke publika sai iha Jornál Repúblika mak foin bele halo graduasaun tanba ida-ne’e mak tuir lei ne’ebé MESSK iha.
Reitór Institutu São João de Brito, Padre Isaías Abílio Caldas, informa tinan ida-ne’e estudante hamutuk na’in-97 husi departamento haat kompostu husi Ensino do português, ensino do inglês, ensino de matemática no ensino de ciências religiosas, tanba Departamento sira ne’e hola parte iha Faculdade Edukasaun.
“Ami hala’o tiha ona Judisium iha 29 Novembru liubá ne’e. Ami sei hein hela despaixu ministeriál. Bainhira finalista na’in-97 nee públika ona iha Jornál da República mak ami bele foin halao graduasaun,” nia dehan
Enkuantu, tuir dadus, studante finalista husi ensinu superiór Institutu Superiór Kristál (ISC, sigla portugés) hamutuk 1.237.
Jornalista : Osória Marques
Editór : Cancio Ximenes
