“Natál konvida sarani timoroan sira atu hatene hateke ba ita-nia laran”
DILI, 16 Dezembru 2025 (TATOLI)–Arsebispu Arkidioseze Metropolitana Dili, Dom Virgilio Kardeál do Carmo da Silva, SDB, hateten Natál momentu furak ida-ne’ebé ema hotu-hotu liuliu sarani timoroan atu hateke ba ida-idak nia laran.
“Ita Timor ne’e dalabarak temi kona-ba Natál sempre hanoin liu kona-ba festa, hanoin liu kona-ba feriadu, hanoin liu oinsá halo infeta lampu sira lakan nabilan iha fatin-fatin. Hanesan iha Dili laran ita haree ne’e, buat sira-ne’e ajuda ita atu bele selebra Natál maibé tempu adventu no Natál ne’e momentu furak ne’ebé konvida ita liuliu sarani timoroan hotu atu hatene hateke ba ita-nia laran no fuan tanba natál ita ko’alia kona-ba domin,” Dom Virgilio Kardeál hateten ba jornalista sira iha Palásiu Prezidensiál Nicolau Lobato, Bairru Pite, ohin.
Nia dehan, tempu adventu ne’e ema hotu tenke prepara an hodi selebra Natál ho domin liuhusi prepara an oinsá bele hasoru malu ho Kristu, hasoru malu ho Maromak-Oan ne’ebé halo an ba ema.
“Ida-ne’e oinsá ita bele hafoun ita-nia domin, hafoun ita-nia hahalok sira, hafoun ita-nia hanoin sira ho kristu nia moris ne’e bele sai momentu furak ida ba ita hotu,” nia dehan.
Hafoun ema hotu nia an mak sai momentu furak ida-ne’ebé selebra Natál ho domin ba ema hotu.
“Ida-ne’e mak ha’u konvida ema hotu atu aproveita tempu adventu ne’e ho didi’ak, la’ós hateke de’it ba lampu sira naroman, maibé hatene hateke ba ita-nia an mak foin bele selebra Natál ida-ne’e ho di’ak no kmanek,” nia dehan.
Jornalista : Hortencio Sanchez
Editór : Cancio Ximenes
