DILI, 17 Dezembru 2025 (TATOLI)-Deputadu iha Parlamentu Nasionál husi Partidu Kongresu Nasionál Rekonstrusaun Timorense (CNRT, sigla portugés), Saul Salvador, ezije atensaun Governu ba labarik sira ne’ebé hala’o atividade negósiu iha fatin públiku.
Nia observa katak, iha Dili, menoridade barak mak kontinua hala’o atividade negósiu ho kondisaun ne’ebé la aseguru no nesesita atensaun.
Tuir nia, situasaun ne’e viola direitu fundamentál sira iha Konstituisaun artigu 18, 19, lei númeru 10/2008 kona-ba Protesaun ba Labarik no Konvensaun Direitu Labarik, ne’ebé Timor-Leste ratifika atu defende sira-nia direitu.
“Maibé, realidade labarik sira presiza apoia família no la hetan akompañamentu sosiál sira sai vuneravel tebes”, nia preokupa.
Tanba ne’e, presiza hadi’a sistema kontrolu no atendimentu di’ak hodi fó solusaun ba problema referidu. Hodi solisita ba Governu presiza halo fiskalizasaun rigoroza husi autoridade lokál nomós Polísia Nasionál Timor-Leste (PNTL) iha fatin sira ne’ebé labarik sira halo atividade atu aplika lei ba kazu esplorasaun ka neglijénsia parentál.
No apoiu sosiál ba família sira ne’ebé ki’ak atu fó alternativa, presiza kampaña hodi sensibiliza ba komunidade kona-ba direitu labarik, tanba lei ne’ebé aprova tenke implementa ho justisa. Nune’e, labarik sira labele hetan tratamentu hanesan adultu, tanba hala’o atividade iha fatin públiku fó risku ba sira-nia seguransa, edukasaun no dignidade.
“Situasaun ne’e la fó respeitu ba lei ne’ebé fó garantia katak, labarik tenke hetan edukasaun, protesaun no moris seguru”, lamenta.
Nia husu parte hotu atu analiza no responsabilidade husi entidade sira relevante hanesan Ministériu Solidariedade Sosiál no Inkluzaun (MSSI) tenke iha papél lidera programa protesaun sosiál ba labarik vuneravel no apoiu ekonómiku ba família.
Ministériu Edukasaun (ME) tenke halo inspesaun ba eskola sira hodi rekolla dadus labarik abandona no kria programa inkluzivu ba sira ne’ebé iha risku.
Ministériu Administrasaun Estatál (MAE) no autoridade lokál sira atu toma medida hodi regula iha koordenasaun ho komunidade. “Ida-ne’e mak husu ba ministériu sira atu halo planu interministeriál atu aborda problema labarik sira-nia”, nia reforsa.
Notísia relevante: INDDICA prepara $15.000 fasilita família labarik ne’ebé fa’an sasán iha dalan públiku
Jornalista: Nelson de Sousa
Editora: Maria Auxiliadora
