DILI, 18 Dezembru (TATOLI)-Komité Orientadór (CO25) koopera ho Universidade Nasionál Timor Lorosa’e (UNTL) atu estabelese Departamentu Istória iha kursu lisensiatura nian hodi hanorin istória Timor-Leste ba estudante sira.
Membru Diretivu CO25, Antero Bendito, dehan halo ona asinatura akordu ho UNTL hodi fó apoiu ba Departamentu Istória, tanba UNTL rasik harii kuaze tinan barak maibé la konsege estabelese kursu ne’e tanba de’it falta istoriadór no biblioteka.
Nune’e, CO25 disponiliza rekursu umanu hodi hanorin no biblioteka ho matéria sira.
Proposta ba establesimentu kursu ne’e submete ona ba ministériu relevante ho Ajénsia Nasionál Avaliasaun no Akreditasaun Akadémika (ANAA) hodi hein despaxu ba lisensa atu kursu ne’e bele komesa iha tinan oin. “Tanba ne’e, prosesu preparativu ba estabelesimentu daudaun la’o hela”, nia hateten.
Atuál dosente iha UNTL ne’e salienta katak preparasaun seluk mak foin lalais kria formasaun ho universidade iha Indonézia kona-ba arkivu no metodolojia istória ne’ebé envolve manorin na’in UNTL.
Liuhusi Komité mós propoin ho UNESCO, nune’e organiza ona konferénsia rejionál iha Jakarta no universidade Malaia iha Malázia, ho ida-ne’e daudaun halibur istoriadór sira iha rejiaun ASEAN ne’ebé univesidade balun iha Departamentu Istória agora kria ona relasaun liuhusi UNESCO ho CO25 no UNTL.
Preparasaun seluk mak serbisu ho UNESCO dezevolve hela kurríkulu, liuliu módulu, matéria didátika sira atu hanorin. “Kria departamentu ne’e nesesita duni, tanba ezijénsia públiku atu hakerek istória no prodús istoriador iha futuru”, dehan.
Tuir planu, departamentu ne’e sei hanorin mós dixiplina istória sira ne’ebé durante ne’e CO25 halo peskiza hodi prodús livru lubun kona-ba prosesu luta ba libertasaun país nian.
Jornalista: Nelson de Sousa
Editora: Maria Auxiliadora
