DILI, 19 Dezembru 2025 (TATOLI)–Kombatente Libertasaun Nasionál hamutuk 27.629 ne’ebé durante ne’e kontribui $30 iha kada fulan dezde tinan 2020 mai to’o ohin loron preokupa no kestiona bainhira mak ko’a osan ne’e para tanba la sente nia vantajen.
Tuir veterana Filomena da Silva “Takaliman”, ho grau 3 (8a14), hosi Munisípiu Vikeke, hateten nia la sente vantajen husi ko’a osan ne’e.
“Ministru Asuntu Kombatente Libertasaun Nasionál, Gil da Costa Monteiro “Oan-Soru” ho Prezidente Administrasaun Konsellu Kombatente Libertasaun Nasionál, Vidal de Jesus “Riak Lemak” presiza halo esplikasaun,” nia hateten iha Komoro, Sesta ne’e.
“Ha’u simu ha’u-nia pensaun kada fulan $270, banku ko’a $30. Ida-ne’e nia rezultadu mak loke ona Banku Nasionál Futuru (BNF). Entaun, ami hakarak hatene benefísiu hosi estabelesimentu banku ne’e. Tanba uluk sira ba halo sensibilizasaun katak atu ko’a osan $30 maibé la dehan bainhira mak para ko’a ne’e,” nia hatutan.
Nune’e, nia rekomenda ba Governu loke dalan ba veteranu nia oan sira hodibele sente mós osan ne’ebé ko’a fulan-fulan.
Aleinde ne’e, Veteranu Cândido da Silva ” Daiwati”, dehan nia mós seidauk simu informasaun klara katak oinsá bele garante futuru jerasaun veteranu liuhusi osan ne’ebé ko’a hodi harii banku.
“Sira dehan osan ne’e ami veteranu sira-nian. Ezemplu, ami halo kréditu ruma karik bele ka lae, tanba to’o agora ami seidauk hatene tanba sira seidauk fó-sai,” nia dúvida.
Nia solisita presiza estabelese lei ka rejimentu ruma para depoiz mak asegura oan ka bei-oan sira-ne’ebé mak iha futuru hodi uza. Karik ida-ne’e mak laiha ne’e sei hamosu dúvida.
Nune’e mós, Veteranu David Dias “Mandati”, dehan ko’a veteranu nia osan $30 ne’e bele ona tanba veteranu sira mós tenke hetan kapitál ida, labele depende loos de’it ba Governu, maibé agora korte ka retornu ne’e oinsá banhira benefisiáriu mate, depoiz nia hatene retornu oinsá.
“Ita seidauk ko’alia buat sira-ne’e. Tanba ne’e, Governu ho CCLN tenke haree fali retornu aban-bainrua oinsá,” nia tenik.
“Horisehik dehan ema ida-ne’ebé durante tinan lima (5) nia tau nia osan $30 to’o ona $2.000. Se liu ona tinan sanulu (10) sira kontribui ona $4.000 no tinan 15 hamutuk ona $6.000 no tinan 20 bele konsege sira kontribui $8.000. Agora, oinsá osan ne’e iha-ne’ebá, karik nia mate, oinsá feen no oan iha direitu ka oinsá?,” nia kestiona.
Entretantu, Veterana Irie da Costa “Talinoko”, informa to’o agora seidauk hatene banku atu ko’a $30 ka lae tanba Governu seidauk anúnsia. Kuandu ko’a mak presiza iha regra ka lei ruma hodi asegura, lae futuru bele mosu problema.
“Tanba ami ferik ona no Governu ida agora ne’e loron ruma sei troka, entaun presiza solusiona programa ko’a $30 ne’e,” nia hateten.
Jornalista: Osória Marques
Editór: Xisto Freitas da Piedade
