Tinan oin, muda negosiante bá merkadu Olobai
VIKEKE, 19 Dezembru 2025 (TATOLI)—Prezidente Autoridade Munisípiu (PAM) Vikeke, Francisco C. S. de Gonzaga Soares, relata progresu implementasaun obra reabilitasaun Merkadu Munisipál Olobai daudaun ne’e atinje ona 80%, nune’e tinan 2026 sei muda negosiante sira bá merkadu referidu.
“Kona-ba reabilitasaun merkadu Olobai daudaun ne’e atinje ona 80%. Ha’u garante obra sei finlizadu iha tempu badak. Hafoin konkluidu ita sei muda negosiante sira husi merkadu tuan bá ne’ebá inkui negosiante sira-ne’ebé fa’an besik dalan sira,” Francisco ba TATOLI iha ninia kna’ar fatin, Vikeke, Sesta ne’e.
Notísia relevante: https://tatoli.tl/2025/05/22/autoridade-vikeke-empreza-vensedor-selebra-kontratu-ba-implementasaun-projetu-pdim-2025/
Nia esplika muda negosiante sira iha merkadu tuan para autoridade reabilita fali merkadu ne’e hodi sai Sentru Kulturál Munisípiu Vikeke nian atubele dada turista lokál, nasionál no internasionál sira mai vizita Vikeke.
“Se ita la prepara kundisaun sira, oinsá ita bele ko’alia kona-ba desentralizasaun no poder lokál. Tan ne’e, ha’u hanoin katak ba tinan oin ita tenke muda ona negosiante bá iha merkadu Olobai,” Francisco informa.
Merkadu Olobai lokaliza iha Suku Karaubalu ne’ebé hahú reabilita iha fulan-Maiu 2025. Orsamentu ba reabilitasaun ne’e hamutuk $273.951,88, reabilita husi empreza Vaniela Unipessoal, Lda.
Enkuantu, tuir dadus, negosiante ne’ebé daudaun hala’o negósiu iha merkadu antigu Postu Vikeke Vila hamutuk 140.
Jornalista: Vitorino Lopes da Costa
Editór: Xisto Freitas da Piedade
