VIKEKE, 22 Maiu 2025 (TATOLI)—Prezidente Autoridade Munisípiu (PAM) Vikeke, Francisco C.S de G. Soares, akompaña husi sekretáriu munisipál asuntu Programa Dezenvolvimentu Integradu Munisípiu (PDIM) no Sekretáriru Munisípiu asuntu Organizasaun no Komunitária, kinta ne’e, selebra kontratu ho empreza vensedór ba konkursu públiku projetu PDIM lima ne’ebé implementa iha tinan 2025.
Prezidente Autoridade Munisípiu (PAM) Vikeke, Francisco C.S de G. Soares, husu empreza vensedór ba projetu lima ne’ebé husi autoridade munisípiu Vikeke tenke prontu no kompre ba regra sira-ne’ebé aprovizionamentu no PDIM ne’ebé fó sai, hodi ezekuta obra sira-ne’e ho responsablidade.
“Ha’u husu ba empreza sira tenke prontu ona, karik empreza ida-ne’ebé sente la prepradu lalika hakat ba asina kontratu maibé ha’u hanoin buat hotu loos ona, ne’ebé ita hakat ba asina kontratu hodi implementa obra. Nune’e ha’u husu ba ekipa jurí sira tenke akompaña empreza sira hodi implementa obra tuir ninia dalan,” Francisco C.S de G. Soare hateten iha salaun administrasaun Vikeke, ohin.
Ni a enkorja, empreza sira tenke prepara an hodi hakat ba oin, Vikeke labele iha kotuk bei-beik tanba hakarak prepara aan ba dezentralizasaun podér lokál, empreza sira tenke kesi metin sintu hodi bele kompete.
“Tanba ne’e, agora ita sei iha faze taranzisaun. Maske ita halo prakualifikasaun iha munisípiu, maibé ita lori ba nasionál mak haree ba baze legál sira. Tan ne’e mak ita liuhusi prosesu lubuk foin hetan manán na’in-lima ba projetu lima. Ha’u espera empreza lima tenke prepara aan forte, para ita kompete. Iha munisípiu ida-ne’e ita la haree ba kór polítiku, la haree ba grupu, ita haree ba rekezitu ne’ebé ita iha,” nia dehan.
Nia dehan, kontratu asina ona ba oin empreza sira hahú implementa obra no autoridade sira akompaña prosesu ezekusaun obra sira-ne’ebé kada empreza lima implementa.
Diretór PDIM munisípiu Vikeke, Joaquim Fernandes, haktuir PDIM nu’udár implementadór ba projetu lima ne’ebé implementa iha tinan ida-ne’e ne’ebé empreza sira kuandu iha buat ruma tenke konsulta ho PDIM.
“Ba implementasaun projetu lima ne’e ha’u husu ba enjiñeiru empreza tenke kolabora ho enjiñeiru DPIM. Nune’e mós servisu hotu-hotu tenke tuir dezeñu Planta no kadernu Enkargu ka BoQ no labele sees husi dezeñu ne’ebé ita iha. Serbisu ba obra lima ne’e tenke finaliza lalais iha fulanDezembru 2025. Se la finaliza orsamentu sei tau ba 2028 no 2029. Tanba ne’e, ami husu hodi aselera serbisu ohin asina ona hahú aban ba oin komesa servisu dadauk ona,” nia dehan.
Projetu lima ne’e kompostu husi reabilitsaun merkadu Olobai Vikeke Vila, konstrusaun uma maternidade postu Uatulari, konstrusaun irrigasaun Welafua postu Lakluta, sentru saúde Uatukarbau extensaun sala lima (5)-toilet rua (2) no reabilitasaun irrigsaun Futudu postu Ossú.
Ba projetu lima ne’e ho totál osamentu hamutuk $1,076,782, no orsamentu ne’e mai husi Orsamentu Estadu OJE 2025.
Entretantu, empreza lima ne’ebé asina kontratu mak hanesan Finlos Unipesoál, Lda, Nefcydorje Unipesoál, Lda, Bonnanenia Unipesoál, Lda, Comtér Unipesoál, Lda, no empreza Caniela Unipesoál, Lda.
Iha serimónia asina kontratu ne’e hetan partisipa husi ekipa jurí, diretór munisípiu no diretór territorial, diretór empreza manán-na’in sira, enjinéru husi empreza lima no funsionáriu munisípiu Vikeke.
Jornalista : Vitorino Lopes da Costa
Editór : Cancio Ximenes
