DILI, 20 Dezembru 2025 (TATOLI) – Iha jogu finál liga Voleiból Femenina Timor-Leste, klube AD SLB halakon Assalam ho pontu 25-18 iha set datoluk.
Durante kompetisaun, jogadora husi klube rua hatudu performa ho tátiku ne’ebé kompetitivu tebes, nune’e iha set dahuluk Assalam manán uluk ho pontu 25-21. Enkuantu iha parte daruak AD SLB lidera fali pontu 25-22 no iha jogu parte ikus nia AD SLB nafatin okupa ho pontu 25-18. Nune’e, vensedór iha jogu ne’e mak AD SLB.
Koordenadór Klube AD SLB, Mário Bento Soares de Sousa, kontente tebes ho esforsu husi jogadora sira-nian performa iha kampu.
“AD SLB nafatin sai manán-na’in iha jogu voleiból feto ba daneen. Jogu ohin ne’e hanesan, maibé iha kualidade husi atleta lokál no Indonézia na’in-rua ne’ebé apoia ami. Assalam mós iha jogadór na’in-rua husi Indonézia”, koordenadór ne’e informa hafoin ramata jogu iha jináziu Dili, ohin.
Nia salienta katak iha kompetisaun sempre iha lakon no manán, nune’e sira sei kontinua treinu atu mellora tátiku sira iha jogu sira iha futuru.
Atleta husi AD SLB, Maulidhatul Aulya Windy, satisfeita ho rezultadu jogu maski foin mak partisipa kompetisaun iha Timor-Leste hodi apoia nia klube.
“Durante kompetisaun la’ós ami de’it mak esforsu, maibé ohin jogadora husi klube seluk mós, maibé ho ami-nia koordenasaun ekipa ami bele lidera jogu ida ne’e. Ba oin ha’u sei hatudu performa ne’ebé di’ak”, nia promete.
Lembra katak kompetisaun voleiból ne’e nia abertura iha loron 26 fulan-Novembru 2025 no iha finál jogu ne’e partisipa mós husi Primeiru-Ministru, Xanana Gusmão, no membru governu sira seluk.
Jornalista: Alexandra da Costa
Editora: Maria Auxiliadora
