DILI, 22 Dezembru 2025 (TATOLI) – Ministériu Agrikultura Pekuária, Peska no Floresta (MAPPF) organiza retiru anuál ho tema “Avaliasaun Serbisu no Natál Hamutuk Família Boot MAPPF Tinan 2025”.
Atividade ne’e hala’o iha salaun Delta Nova, Komoro, ho sub tema “Hametin espíritu serbisu hamutuk ho unidade hodi fó kontribuisaun sinerjia no inovasaun ba seguransa ai-han saudavel iha Timor-Leste”.
Retiru ne’e hahú ho reflesaun ne’ebé prezide husi Padre Ângelo Salsinha, ne’ebé hato’o katak nu’udar funsionáriu iha ministéiru ne’e orgullu ba serbisu ne’ebé halo ona iha tinan ne’e to’o nia rohan, iha alkansa ho mós ninia dezáfiu sira nu’udar servidór tenke enfrenta.
“Bainhira ema hotu rona ida-ne’e, ho atentu tama iha paixaun, halo buat hotu la’ós ema gosta, gava no basa-liman ba ó, maibé tama iha dezertu paixaun, halo disernimentu ne’ebé kle’an mak deskobre domin ne’e mai husi ó-nia serbisu”, nia hateten.
Tuir saserdote ne’e, atu deskobre domin husi serbisu, sinerjia, paixaun, lealidade, serbisu hamutuk hothotu nia mehi mak ba prosperiedade povu nian. “No unidade, responsabilidade, reziliente iha valór sira lori malu tama ba dezertu mak ita-nia misaun loloos, vizibilidade no responsabilidade”, dehan.
Hodi haktuir evanjellu Saun João Baptista lori ema hotu atu komprende oinsá sai ema ne’ebé loloos, komprende Maromak nia domin”. “Atu koko Maromak nia domin, haruka nia ba tama iha rai-fuik maran, nia hakilar lian ne’ebé ho domin hatún tiha foho sira, haloos Na’i nia dalan, taka rai-ku’ak no halo dalan kle’uk sira ho loloos. Ne’e mak ita-nia misaun no kompromsiu loloos nu’udar servidór nasaun tau aas liu nasaun no povu nia interese”.
Iha fatin hanesan, Vise-Primeiru-Ministru ba Asuntu Sosiál, Mariano Assanami Sabino, konsidera papél ministériu ne’e importante ko’alia kona-ba soberania alimentár. Nune’e ninia mensajen ba funsionáriu sira hotu ho tinan 2026 ho hanoin pozitivu atu serbisu di’ak liután, liuliu koopera malu nafatin, unidade no metin liután tanba sai ajente nu’udar autór ba prosesu dezenvolvimentu.
Ministru Agrikultura, Pekuária, Peska no Floresta, Marcos da Cruz, hateten vizaun iha Governu Dasiak liuhusi orientasaun Primeiru-Ministru ba ministériu mak fornese ai-han sufisiente ho kualidade no sustentavel orienta ba merkadu.
“Ida-ne’e vizaun komún ne’ebé ita buka atu dezenvolve setór haat ne’e, tanba ne’e ita-nia programa sira buka oinsá atu atinje mehi ne’e”, realsa.
Durante ne’e ministériu serbisu hamutuk ho parseiru sira no buka moderniza setór ne’e mak tau atensaun ba infrestrutura báziku ahanesan irrigasaun ba dezenvolvimentu iha área agrikultura.
Tanba ne’e ho esforsu sira, iha tinan ne’e, MAPPF konsege halo ona lansamentu ba irrigasaun boot hamutuk neen.
Aliende ne’e, disponibiliza mós mákina moderna ba agrikultór sira, promove dezenvolvimentu agrikultura orgánika.
Iha parte pekuária, dezenvolve daudaun produsaun animál no garante saúde animál. Ba setór peska dezenvolve akuakultura no kontinua fornese bero ba peskadór sira atu ka’er ikan.
Sekretáriu Estadu Floresta, Fernandino Vieira, husu ba servidór Estadu iha ministériu ne’e atu fó ninia dedikasaun no enerjia tomak hodi serbí di’ak liután país.
Sekretáriu Estadu Peska, Domingos da Conceição dos Santos, kontinua enkoraja funsionáriu atu serbisu maka’as, tanba misaun própria ministériu nian haree ba ezijénsia oinsá hasa’e produsaun, redús importasaun, hamenus ki’ak ho kombate má nutrisaun.
Jornalista: Nelson de Sousa
Editora: Maria Auxiliadora
