Ramos-Horta: “Natál fó domin ba timoroan iha rai-laran no rai-li’ur”
DILI, 22 Dezembru 2025 (TATOLI)—Prezidénsia Repúblika, José Ramos-Horta, servisu hamutuk ho Governu Konstitusionál da-sia (IX) realiza selebrasaun anuál “Natál ho Povu”.
“Natál ida-ne’e fó domin mai ita, ba timoroan hotu iha rai-laran no rai-liur. Ha’u-nia hakuak boot ba imi hotu,” Prezidente Repúblika, José Ramos-Horta, hateten iha nia diskursu bainhira selebra “Natál ho Povu” iha Palásiu Prezidensiál Nicolau Lobato, Bairru Pite, ohin.
Iha biban ne’e, Prezidente Repúblika hato’o agradesementu ba doadór no parseiru sira hotu ne’ebé ajuda halo selebrasaun ida-ne’e sai posivel, tanba sira-nia jenerosidade hasa’e apoiu ne’ebé fó ba komunidade no labarik sira durante tempu Natál ida-ne’e.
Programa “Natal Ho Povu” sai nu’udar testemuña ba kompromisu Prezidénsia no Governu nian hodi promove unidade nasionál, selebra kultura Timor-Leste nian, no fahe bensaun sira Natál nian diretamente ho sidadaun sira-ne’ebé sira serbí.
Iha fatin hanesan, Reprezentante Governu no atuál Visé-Primeiru-Ministru, Ministru Koordenadór Asuntu Ekonómiku no Ministru Turizmu no Ambienta, Francisco Kalbuadi Lay, hateten natál nu’udar loron ba selebrasaun loron moris Kristu nian iha ámbiente natalisiu.
“Natál nu’udar loron ba selebrasaun nascimento Kristu nian, fiar katak iha natál ida-ne’e, iha ne’e hanesan oportunidade ida, atu reafirma ita hotu nia kompromisu ba moris di’ak povu nian no dezenvolvimentu ba ita-nia nasaun,” Kalbuadi hateten.
Atividade ne’e partisipa másimu husi povu baibain, labarik kiik sira, sidadaun ne’ebé ho kondisaun difisiénsia, Prezidente Tribunál Rekursu, Xefe Estadu Maior das Forsas Armada, Tenente Jenerál Falur Rate Laek no korpu diplomátiku sira-ne’ebé hala’o misaun iha Timor-Leste.
Selebrasaun “Natál ho Povu” ne’e halibur komunidade oioin iha nasaun ho espíritu unidade durante tempu Natál nian, hahú ho festivál família nian ne’ebé vibrante.
Jornalista : Hortencio Sanchez
Editór : Cancio Ximenes
