DILI, 24 Dezembru 2025 (TATOLI)-Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten Jesus nia moris mak lori novidade ida lori ema hotu ba natál no Maromak nia oan ida-ne’ebé lori rahun di’ak lalehan nian ba ema ida-idak, tanba Maromak moris iha mundu hanesan oan ida.
“Maromak moris iha mundu moris hanesan oan ida, atu halo ita sai oan Maromak nia oan. Hanoin ida-ne’e mak Natál ne’e sai novidade ba ita. Maromak halo an moris hanesan oan, atu halo ita sai Maromak oan,” Dom Virgílio Kardeál hateten iha omilia bainhira prezide misa Natál nian iha Igreja Katedrál, Dili, ohin.
Bispu ne’e hatutan, prezente ida-ne’ebé fuark tebes duni mak ohin Maromak kontente no dehan ba nia emar sira ida-idak katak ema mak furak ida Maromak ninian.
Tanba ne’e, lalika dezanima monu ba tentasaun tanba Maromak sempre la’o hamutuk ho ema ida-idak, tanba husi kanek no dezafiu oioin ne’ebé mosu, hamosu verdade ida de’it mak “ita Maromak oan”.
“Maromak nia domin mai ita, nune’e mós sei la depende mai ita. Ida-ne’e mak domin ida gratuitu. Iha kalan ida-ne’e, ita hetan resposta mak Maromak nia grasa. Aman ne’ebé la fó buat ida duké fó ninia oan rasik. Ne’e mak ksolok ne’ebé boot liu hotu ba umanidade,” nia dehan.
Maibé, tuir nia, wainhira haree ema-nia ingratidaun hasoru Maromak no insjustisa ne’ebé ema halo hasoru malu mosu dúvida oioin, maske Maromak halo di’ak wa’in ba ninia emar sira, Maromak la kolen atu tulun nia emar sira fiel ba Nia.
“Moromak hadomi ita to’o mate. Ida-ne’e mak Maromak ninia segredu atu tama iha ita ema ninia fuan. Maromak hatene dalan úniku atu salva ita, atu kura ita-nia kanek mak hadomi ita. Laiha dalan seluk. Maromak nia domin mai ita konstante maibé ita hatán ho kontrariu,” nia hateten.
Tanba, nia dehan, Jesus nia domin de’it mak transforma vida no bele kura ema-nia kanek sira-ne’ebé kle’an hodi liberta ema husi hirus, laran moras, mur-mura no hahalok sira seluk ne’ebé kontra Maromak nia domin.
“Ha’u la ko’alia ho liafuan maibé ha’u halo-an hanesan ó no atu fó hanoin ba ó tempu atu hahú fali ó-nia moris, hodi rekoñese hanesan Maromak nia oan. Ida-ne’e mak tempu atu hahú ninian no ida-ne’e mak tempu esperansa,” nia dehan.
Jesus mai iha mundu hanesan ema ki’ak ne’ebé moris iha Belem iha bibi-luhan ida, katak kosok oan Jesus mai atu orienta Maromak nia oan sira-nia moris iha mundu ne’e.
“Liafuan Belem ne’e signifika “Casa do Pão” ka “Uma Paun Ninian”. Maromak iha animál han fatin ida, atu fó hanoin mai ita katak atu moris ita prezisa Nia hanesan paun atu ita bele han. Ita preszia husik Maromak nia domin tama iha ita-nia moris,” Dom Virgílio Kardeál esplika.
Jornalista : Hortencio Sanchez
Editór : Cancio Ximenes
