PNTL halo apreensaun ba motorizada 10 iha ámbitu selebrasaun Misa Natál
DILI, 25 Dezembru 2025 (TATOLI)—Polísia Nasionál Timor-Leste (PNTL) halo apreensaun ba motorizada hamutuk 10 durante selebrasaun Misa Natál kalan orsehik (24/12).
“Durante selebrasaun Natál orikalan, ita preende motorizada hamutuk 10 tanba uza kanu racing. Oras ne’e motorizada sira asegura iha Komandu Munisípiu Dili,” Komandante Munisípiu Dili, Superintendente Xefe Polísia Orlando Gomes, hato’o ba Ajénsia TATOLI via telefónika, Kinta ne’e.
Nia dehan, durante selebrasaun Misa Natál situasaun iha igreja sira kontroladu, sarani sira tuir misa ho di’ak no laiha perturbasaun orden públika.
“Orikalan situasaun iha Parokia sira la’o di’ak, sarani sira tuir misa ho di’ak tanba ita koloka membru sira iha Parokia sira hodi fó seguransa másima iha fatin ne’e, ne’ebé situasaun ein jerál orikalan buat hotu la’o di’ak,” nia akresenta.
Notísia relevante : Komandu PNTL Kovalima halo inspesaun ba motorizada OPS 30
Orlando informa liután katak, iha área balun mak joven sira hemu lanu hodi kria problema, maibé Polísia halo kedan atuasaun.
“Ita mós orikalan ne’e rejista krime balun iha bairru sira hanesan iha área juridisaun Dom Aleixo, joven sira baku malu tanba lanu, Polísia foti joven balun iha ne’ebá hodi submete ba prosesu,” nia katak.
Komandante Orlando mós katak, durante selebrasaun Natál kalan Komandu Munisípiu Dili mós rejista asidente tráfegu ida iha área Hudi-Laran.
Nia dehan, joven ida kondús motorizada ida ho kondisaun lanu hodi soke karreta no konsege lori bá Hospital Nacional Guido Valadares Dili maibé la salva nia vida tanba nia ran sai barak.
Jornalista : Natalino Costa
Editora : Julia Chatarina
