OEKUSI, 11 Janeiru 2026 (TATOLI) – Vise Primeiru-Ministru no Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano Asanami Sabino, domingo ne’e observa sentru produsaun masin iha lagoa Maesmone suku Taiboko sub-rejiaun Pante Rejiaun Administrativa Espesiál Oekusi Ambeno (RAEOA).
Hafoin observa, Governante ne’e rekomenda ba Ministériu Komérsiu no Indústria (MCI) hodi konsentra atu haluan tan, tanba polítika ne’e nu’udar programa pilotu ba dezenvolvimentu rurál.
“Obra ne’e hosi MCI oinsá prepara indústria ba masin nian, tanba área dezenvolvimentu rurál ne’e, atu haree setór sira iha área ruraís, atu transforma ba indústria, ita haree ida-ne’e hanesan pilotu maibé tenke habelar, tenke iha konsentrasaun, tanba área ne’e sei luan hosi sorin-sorin to’o leten ne’ebá, rai sei luan hela, entaun bele implementa bo’otliu tan,” Asanami ko’alia ba jornalista sira hafoin observa.
Notísia relevante:MCI ho lia-na’in Taiboko realiza serimónia rituál molok lansa sentru produsaun masin iha Lagoa Maesmone
Nia subliña, nu’udar Ministru Dezenvolvimentu Rurál nia haree no koordena, ba fatin ne’ebé indústria rurál sira ne’ebé iha poténsia boot, atu fó rendimentu ba populasaun.
“Tanba ne’e mak ita sei koordenasaun ho Prezidente Autoridade RAEOA ho nia setór sira hotu, ne’ebé iha relasaun ho asuntu indústria, agrikultura, pekuária, peska, floresta no komersializasaun, ita haree atu oinsá bele asegura seguransa alimentár ba futuru nian, ida-ne’ebé ita identifika no halo mapeamentu ba fatin sira-ne’ebé bele hasa’e produsaun,” nia afirma.
Iha biban ne’e, Diretór Diresaun Rejionál Komérsiu no Indústria Oekusi, Orlando Quelo, relata katak, konstrusaun ba sentru produsaun ne’e fazeadamente tanba antes ne’e Autoridade RAEOA atribui ona rai ektare 10, no daudaun ne’e Ministériu Komérsiu no Indústria hahú ona konstrusaun ba ektare ida nian.
“Konstrusaun ne’e konklui ona iha fulan-Novembru 2025 maske seidauk iha rezultadu, maibé MCI iha responsabilidade másimu, tanba bainhira atu produs masin presiza bailoron no tasi-been labele kahur ho udan-been, tanba ne’e mak agora husik hela maibé tékniku sira kontinua tau matan tanba fasilidade sira, kompleta ona iha terenu hodi prepara ba tempu bailoron atu utiliza ba faze produsaun masin,” nia hateten.
Notísia relevante:Governu hatuur fatuk dahuluk sentru produsaun masin iha Oé-Cusse
Tuir observasaun jornalista Ajénsia Tatoli,I.P nota, iha vizita ofisiál ne’e, hetan akompañamentu hosi Prezidente Autoridade RAEOA, Régio da Cruz, Koordenadór ZEEDOA Herculano de Souza no entidade relevante sira seluk no konstrusaun referida monta ona lutu hale’u no konstrui ona mákina supa bee-tasi hodi fornese ba sentru produsaun.
Notísia relevante:RAEOA oferese rai ektare 10 ba MKI estabelese sentru produsaun masin
Jornalista: Abílio Elo Nini
Editór: Rafael Ximenes de A. Belo
