DILI, 20 Janeiru 2026 (TATOLI)-Deputada husi Partidu Kongresu Nasionál Rekonstrusaun Timorense (CNRT, sigla portugés), Maria Rosa Câmara ‘Bisoi’, husu atensaun urjente ba entidade kompetente atu hadi’ak jestaun iha Jardín Eroi Metinaru.
Nia husu Komisaun F ne’ebé Trata Asuntu Saúde, Igualidade, Jéneru no Inkluzaun atu halo fiskalizasaun urjente ba iha fatin ne’e hodi haree kondisaun atuál, nune’e bele rekomenda ba ministériu no entidade tutela tau atensaun ba rate saudozu sira-nian, tanba kondisaun atuál nesesita duni atensaun.
“Rate eroi iha Metinaru, animál tama iha laran, bee laiha, ai-funan ne’ebé uluk iha, agora laiha totál, du’ut moris, presiza hadi’a”, nia kestiona.
Deputada ne’e mós preokupa ho hakoi mate la tuir regra eskalaun ba dedikasaun no presiza iha regra bainhira hakoi ona saudozu sira-nia isin-mate iha ne’ebá. Tanba daudaun família hasai filafali ruin saudozu sira-nia no halo rai-ku’ak mamuk barak. “Hanoin ida-ne’e istória nasionál, labele hasai husi iha jardín”, nia preokupa.
Prezidente Konsellu Kombatente Libertasaun Nasionál, Vidal de Jesus ‘Riak Leman’, hateten daudaun koloka hela pesoál traballadór iha ne’ebá, nune’e sei halo koordenasaun hodi komunika ho Ministériu Kombatente Libertasaun Nasionál hodi haree liután jestaun iha fatin importante ne’e.
Jornalista: Nelson de Sousa
Editora: Maria Auxiliadora
