DILI, 22 Janeiru 2026 (TATOLI) – Ministru Interiór, Francisco da Costa Guterres, relata serbisu ne’ebé implementa ona iha tinan 2025 no aprezenta prioridade tinan ne’e ba Komisaun B ne’ebé trata Asuntu Negósiu Estranjeiru, Defeza no Seguransa iha Parlamentu, liuliu investe iha infraestrutura bázika ba polísia sira.
Governante ne’e relata katak programa ho nia atividade ne’ebé hala’o ona iha tina kotuk, liuliu iha polísia nian mak reforsa infraestrutura bázika, ekipamentu, reestruturasaun ba estrutura, rekrutamentu, promosaun, bein estar, mentalidade nomós iha imigrasaun nian. “Ida-ne’e rezolve ho gradualmente no fó kontinuidade ba iha tinan ne’e, ho informasaun ne’ebé hato’o atu fasilita Komisaun hodi hala’o fiskalizasaun di’ak liután”, dehan.
Nia relata kata, iha tinan kotuk, halo ona konstrusaun no reabilitasaun ba postu polísia hamutuk 49 iha fronteira terrestre no maioria kuaze atu konklui, hafoin kompleta ekipamentu hodi utiliza ba hala’o serbisu ho di’ak liután.
“Prioridade iha 2026 kontinua hadi’a infraestrutura bázika ba polísia tomak no Rekrutamentu hodi aumenta kapasidade pesoál, tau-matan liután ba Imigrasaun, seguransa sivíl no prevensaun konflitu”, nia hateten hafoin audiénsia iha Parlamentu, ohin.
Lembra katak MI nia Orsamentu Jerál Estadu (OJE) 2025 hamutuk $15.000.336 hodi aloka ba saláriu no vensimentu $12.276.037, bens no servisu $2.158.319, kapitál menór $40.184, no kapitál dezenvolvimentu $525.796, ne’ebé ezekuta to’o 97%.
Iha OJE 2026 prevee $14.477.099 hodi aloka ba saláriu no vensimentu $12.208.360, bens no servisu $1.918.739 no kapitál menór rihun $300.
Notísia relevante: https://tatoli.tl/2025/11/19/parlamentu-aprova-mi-nia-orsamenu-millaun-17-477-iha-espesialidade/
Prezidente Komisaun B, Domingos Augosto ‘Deker’, hateten objetivu husi audiénsia ne’e atu relata filafali rezultadu fiskalizasaun ba OJE 2025, bazeia ba preokupasaun iha terrenu. Komisaun husu ba ministériu atu fornese informasaun detalla, nune’e bele fasilita fiskalizasaun tuirmai.
“Iha fiskalizasaun identifika kestaun barak, hato’o ona pur eskrita , maibé ne’e asuntu konfidensiál lubun [liga ho seguransa] nian, la presiza fó sai iha públiku”, dehan.
Audiénsia ne’e partisipa mós husi Komandate Jerál PNTL, Komisáriu Henrique da Costa.
Jornalista: Nelson de Sousa
Editora: Maria Auxiliadora
