CMCLN Baukau konsidera reabilitasaun estrada urbana responde preokupasaun komunidade
BAUKAU, 05 Fevereiru 2026 (TATOLI)—Konsellu Munisipál Kombatente Libertasaun Nasionál (CMCLN-sigla portugeza) Baukau konsidera Governu sentrál deside reabilita estrada urbana nu’udár parte responde ba komunidade nia lian iha Munisípiu Baukau.
Prezidente CMCLN Baukau, Cornélio da Conceição Gama ‘L7’ esplika estrada sai fatór determinasaun ba progresu dezenvolvimentu tanba halo konetividade transporte no movimentasaun komunidade bainhira hala’o atividade ekonomia iha Munisípiu Baukau.
“Ami veteranu Baukau hamutuk ho povu kontente ho reabilitasaun estrada iha Baukau tanba dezenvolvimentu dahuluk mak estrada,” Prezidente CMCLN Baukau L7 hateten iha ninia kna’ar fatin, Vila Antiga, Kinta ne’e.
Eis deputadu ne’e hato’o agradese ba Governu ne’ebé fó-atensaun ba prekupasaun komunidade tanba kondisaun estrada urbana iha Baukau Vila kategoriza estragu nune’e presiza halo reabilitasaun.
Aleinde ne’e, bainhira estrada urbana reabilita sei aselera implementasaun podér lokál desentralizasaun administrativa iha-ne’ebé bele fó podér ba lideransa atu deside dezenvolvimentu munisípiu ne’ebé krexe ekonomia no benefísia direta povu Baukau.
“Desentralizasaun ne’e futuru fó poder ba ami atu halo netik dezenvolvimentu ba Baukau. Kuandu kontinua sentraliza ida-ne’e ami labele halo buat ida,” L7 akresenta.
Tuir planu, prosesu reabilitasaun estrada urbana Baukau Vila sei hatuur fatuk dahuluk husi Primeiru-Ministru, Xanana Gusmão, iha Sesta (06/02/2026). Obra ne’e responsabiliza husi Kompañia Jova Construction Unipessoal, Lda.
Entretantu, estrada urbana iha Baukau Vila hamutuk kilómetru 23 kompostu diresaun husi Nagardjo ba Vila Antiga, Nagardjo bá rotunda Vila Nova, Vila Antiga to’o Bugaeti, rotunda Uailia Lamegua to’o Tirilolo, Rotunda Vila nova bá Uatulete inkluindu diresaun Vila Nova bá Vila Antiga.
Jornalista: Natalino Belo
Editór: Xisto Freitas da Piedade
