DILI, 12 Fevereiru 2026 (TATOLI)–Governu Japaun apoia orsamentu ho montante $506.000 ba Governu Timor-Leste atu hametin saúde inan iha Munisípiu Bobonaru, liuhusi projetu “Hadi’a Kualidade Serbisu Saúde Inan liuhusi Haforsa Kapasidade Médika no Hadi’a Infraestrutura iha Munisípiu Bobonaro iha Faze Daruak”.
Embaixadór Japaun iha Timor-Leste, YAMAMOTO Yasushi, relata entre atividade prinsipál sira-ne’ebé planeia mak instalasaun sistema enerjia solár iha unidade saúde oioin no formasaun ba profisionál sira kona-ba utilizasaun ultrasonografia ba konsulta prenatal sira.
“Projetu ne’e inklui mós formasaun komunikasaun ba profisionál saúde sira no implementasaun aula ba inan sira, iha kolaborasaun ho grupu apoiu inan. Frontline hanesan ONG Japaun ida-ne’ebé fó apoiu ba setór saúde iha Timor-Leste dezde tinan 1999, molok restaurasaun independénsia,” Embaixadór Japaun ne’e hateten iha nia diskursu, iha serimónia asina akordu ba projetu ne’ebé realiza iha edifisiu Embaixada Japaun iha Dili, ohin.
Embaixadór ne’e relata, iha ámbitu Programa Asisténsia ba Projetu ONG Japaun nian, projetu sira hala’o ona iha Dili, Ermera no Bobonaru.
“Ha’u hetan feedback ne’ebé pozitivu tebes kona-ba formasaun ultrasonografia no fornesimentu ekipamentu ultrasonografia iha Ermera, ne’ebé hatudu impaktu pozitivu husi sira-nia atividade,” Diplomata Japaun ne’e dehan.
Reprezentante Governu Japaun nian ne’e mós hato’o esperansa katak, profisionál saúde sira, inan isin-rua sira, sira-nia parseiru, família no komunidade sei hetan koñesimentu ne’ebé iha valór liuhusi projetu ne’e, nune’e kontribui hodi salva vida no hato’o mós ninia deseju sinseru ba inisiativa ne’e nia susesu.
Polítika asisténsia ba dezenvolvimentu Japaun nian aliña ho Planu Estratéjiku Dezenvolvimentu Timor-Leste nian, ne’ebé define setór saúde nu’udar prioridade ba hadi’ak populasaun nia kondisaun moris.
Governu Timor-Leste hanoin atu habelar asesu ba kuidadu inan ho kualidade no fó kbiit ba komunidade sira hodi kontribui ba hadi’a saúde inan nian, hanesan estabelese ona iha Planu Estratéjiku Nasionál ba Setór Saúde.
Embaixadór ne’e hateten, iha setór saúde maiória unidade sira hasoru difikuldade operasionál tanba limitasaun espasu no fornesimentu eletrisidade ne’ebé la estavel.
“Munisípiu Bobonaru hasoru dezafiu oioin, inklui asesu limitadu ba kuidadu saúde iha tempu udan. Maske taxa konsulta pre-natal 56%, aas liu mídia nasionál 43%, taxa mortalidade inan no neonatál nafatin aas, no persentajen partu ne’ebé hala’o iha fasilidade saúde sei kiik,” nia dehan.
Dezde 2002, Japaun apoia ona saude inan no oan liuhusi organizasaun internasional sira, JICA, no mos ONG Japaun no lokal sira.
Oras ne’e daudaun, Japaun apoia hela konstrusaun departamentu sirurjia no primatolojia iha Ospitál Nasionál Guido Valadares.
Ho parseria ho UNFPA, hala’o ona mós obra reabilitasaun no formasaun, inklui iha Sentru Saúde Komunitária Lolotoe iha Bobonaru.
Jornalista : Hortencio Sanchez
Editór : Cancio Ximenes
