PNTL Bobonaru halo apreensaun ba veíkulu 89
BOBONARU, 26 Fevereiru 2026 (TATOLI) – Polísia Nasionál Timor-leste (PNTL) seksaun Tránzitu Rodoviáriu Komandu Munisípiu Polísia Bobonaru, halo apreensaun ba veíkulu 89 ne’ebé viola regulamentu sinál tránzitu no Lei Kódigu Estrada.
Xefe Seksaun Tránzitu Rodoviáriu Komandu Munisípiu Polisía Bobonaru, Asistente Inspetór João Belo, esplika katak, iha Janeiru apreende motorizada 39, bus lima no karreta privadu lima. Iha Fevereiru to’o 26 ne’e apreende motorizada 38, bus no karreta privadu kada ida.
Transporte hirak ne’e Seksaun Tránzitu Rodoviáriu no Seksaun Rezerva Intervensaun Rápida (RIR) no Diresaun Transporte Terrestre Delegasaun Territoriál Munisípiu Bobonaru halo apreensaun liuhusi atividade auto-stop iha kapitál Maliana no postu administrativu Balibó no Atabae bazeia ba orientasaun Komandu Munisípiu Polísia Bobonaru.
João Belo esplika katak infratór hirak ne’e laiha dokumentu, balun liu prazu, karta kondusaun laiha, asesories laiha no seluk tan. “Ho ida-ne’e ita rekolla reseita $2.559 iha Janeiru. Hahú fali loron 01 to’o 26 Fevereiru rekolla $1.768. Totál hamutuk $4.327”, nia informa ohin.
Relasiona ho infrasaun ne’e, PNTL kada loron kontinua halo atividade edukasaun sívika ba komunidade nia leet no iha eskola oin, tanba durante ne’e infratór seidauk iha kompriensaun di’ak kona-ba Lei Kódigu Estrada no sinál tránzitu.
“Ita eduka sira kona-ba sinál tránzitu vertikál no horizontál. Vertikál ne’e mak harii de’it iha via públika hodi fó avizu, orienta, no bandu para veíkulu. Sinál horizontál baibain ita haree markasaun iha estrada klaran no mós iha ninin”, dehan.
Seksaun Tránzitu Rodoviáriu mós planeia halo atividade pasa revista iha postu administrativu sira seluk hanesan Bobonaru, Lolotoe no Kailaku.
Notísia relevante: PNTL Bobonaru arrekada reseita $65.186 durante 2025
Jornalista: Sergio da Cruz
Editora: Maria Auxiliadora
