DILI, 27 Fevereiru 2026 (TATOLI)-Parlamentu Nasionál (PN) iha inisiativa hakarak halakon kriasaun Konsellu Konsultivu Fundu Petrolíferu (KKFP).
Tanba ne’e, meza Parlamentu halo ona anúnsiu no baixa projetu lei númeru 12/VI(3a)-Extingue Konsellu Konsultivu Fundu Petrolífeiru no prosede alterasaun datoluk lei númeru 9/2005, loron 03 Agostu, kona-ba Fundu Petrolíferu, no alterasaun daruak lei númeru 12/2017, loron 24 Maiu, Lei Organizasaun no Funsionamentu Administrasaun Parlamentár ba Komisaun D iha Parlamentu Nasionál ne’ebé trata Asuntu Ekonomia no Dezenvolvimentu hodi halo apresiasaun inisiál.
Prezidente Komisaun D, Ricardo Baptista, adianta katak iha semana oin Komisaun hahú diskute ajenda atu halo audiénsia públika ba inisiativa lejizlativa ne’e.
Nia dehan projetu lei ne’e ho objetivu atu halakon tiha KKFP ho razaun durante ne’e ninia funsionamentu la efetivu, mezmu nune’e la esplika detalla tanba sei diskute kle’an iha espesialidade.
Lembra katak, antes ne’e, Sekretária Meza PN, Virgínia Ana Belo, hateten reuniaun líder bankada diskute kona-ba membru KKFP, maibé PN sei rona filafali sira hodi haree iha posibilidade KKFP iha PN atu halakon, maibé sei halo konsulta uluk.
“Tanba KKFP ne’e ninia natureza loloos ne’e bainhira PN iha lejizlatura dahuluk asembleia konstituente nia kriasaun ba ida-ne’e. Ho hanoin ida KKFP membru sira iha laran ne’e mak eis titulár hanesan eis-Prezidente Repúblika, eis-Primeiru-Ministru, eis-Prezidente Parlamentu Nasionál, maibé realidade hahú husi nia funsaun to’o agora laiha ema sira-ne’e no delega fali sira-nia reprezentante mak mai”, nia hateten.
Deputada ne’e realsa katak papél ne’ebé KKFP halo hanesan ho Komisaun C ne’ebé trata asuntu Finansa Públika. “Entaun, tetu took sira mós atribuisaun osan ba sira kuaze atu boot liu tiha fali komisaun sira. Entaun, se sira-nia serbisu prodús relatóriu tinan ida dala-ida ho orsamentu boot maibé não vale a pena”, nia dehan.
Tanba ne’e, presiza halo konsulta hodi halakon, maibé tenke liuhusi lei PN mak aprova. Ba KKFP nia funsionáriu ne’ebé iha, sei integra hotu ba sekretariadu PN.
KKFP eziste iha tinan 2009 ho nia papél mak atu halo avaliasaun periódika no fó pareser tékniku ba Parlamentu Nasionál no Governu kona-ba Rendimentu Sustentavel Estimadu (RSE) no utilizasaun Fundu Petrolíferu.
Hodi asegura katak Fundu Petrolíferu jere ho prudente hodi benefisia jerasaun agora no futuru. KKFP ninia kompozisaun kompostu husi membru sira.
Jornalista: Nelson de Sousa
Editora: Maria Auxiliadora
