BOBONARU, 27 Fevereiru 2026 (TATOLI)-Polísia Nasionál Timor-Leste (PNTL) Seksaun Tranzitu Seguransa Rodoviaria, Komando Munisípiu Polísia Bobonaru, sei halo atuasaun ba movimentu moto elétrika (scooter) ne’ebé labarik sira kondús iha via públika, tanba viola dekretu-lei kódigu estrada númeru 06/2003.
Xefe Seksaun Tránzitu Seguransa Rodoviária Munisípiu Bobonaru, Asistente Inspetór João Belo, dehan to’o agora Seksaun Tránzitu la halo atuasaun polisiál tanba seidauk hetan despaixu eskrita husi Komandu Jerál PNTL.
Notísia relevante: PNTL sei halo operasaun ba movimentasaun motorizada elétrika
“Ita akompaña iha mídia sosiál katak ita sei halo atuasaun polisiál ba sidadaun sira ne’ebé ho menoridade utiliza ona siklumotór eletrika ne’e. Tanba tuir regra, ema ne’ebé idade 16 ba leten mak bele lori, nune’e evita asidente ne’ebé la espera. Karik idade menór mak lori, ita sei bolu inan-aman atu eduka, maibé nia halo violasaun ona tenke submete ba Lei Kódigu Estrada nian”, nia dehan ba jornalista sira, ohin.
Motorista Vidal Sequeira Lopes, husu atu halo atuasaun polisál ho lalais molok akontese asidente, tanba durante ne’e nia observa katak labarik ki’ik sira kondús scooter no halo movimentu la tuir regulamentu.
“Ami preokupa tebes tanba sira bá eskola tula malu rua-tolu, la uza helm, halai arbiru de’it. Balun uluk ita ne’e liu fali liman karuk halo ita hakfodak atu soke sala tan mak iha. Karreta mós sira sikat bá de’it, depois halai kontra fali jalur”, nia lamenta.
Tuir obsevasaun jornalista Tatoli, labarik sira kondús scooter no movimenta barak liu iha tempu dadeer bá eskola no loraik.
Notísia relevante: PNTL sei koordena DRTT regula bisikleta elétrika sirkula iha Oé-Cusse
Jornalista: Sergio da Cruz
Editora: Maria Auxiliadora
