DILI, 02 Marsu 2026 (TATOLI) – Parlamentu Nasionál parabeniza veteranu sira, iha ámbitu Loron Nasionál Veteranu, ne’ebé sei komemora iha 03 Marsu no hato’o agradesimentu ba sira-nia dedikasaun tomak iha luta ba libertasaun nasionál.
“Aban, Loron Veteranu, parabéns ba veteranu hothotu. Tanba ho esforsu tomak Timor-Leste bele ukun-an”, deputadu Partidu Kongresu Nasionál Rekonstrusaun Timorense (CNRT, sigla portugés), Firmino Taeki, hato’o iha reuniaun plenária Parlamentu, ohin.
Helena Martins, deputada Frente Revolusionária Timor-Leste Independente (FRETILIN), husu atensaun ba Estadu atu dignifika veteranu sira ne’ebé iha tempu ukun-an ne’e seida’uk hetan atensaun.
Nia solisita ba Ministériu Asuntu Kombatente Libertasaun Nasionál (MAKLN) atu toma atensaun ba veteranu nia oan sira hodi asesu bolsa estudu, liuliu labele iha diskriminasaun ba atribuisaun subsídiu ba sira ne’ebé hala’o estudu iha rai-li’ur.
Tanba tuir lei númeru 3/2006 define Estatutu Kombatente Libertasaun Nasionál ninia no fó direitu no devér ba ninia famíli, inklui bolsa estudu ba oan sira no dekretu-lei númeru 8/2009, loron 15 Janeiru, define rejime atribuisaun bolsa estudu ba kombatente libertasaun nasionál no mártir sira-nia oan.
Lembra katak Governu estabelese dekretu-lei númeru 3/2016, ne’ebé Estadu Timor-Leste konsagra 03 Marsu nu’udar Loron Nasionál ba veteranu. Estadu deside loron 03 Marsu ne’e sai Loron Nasionál Veteranu sira, tanba iha 03 Marsu 1981 Timor-Leste hahú reorganiza funu ba libertasaun nasionál, hafoin baze-de-apoiu rahun.
Data istórika ne’e liga ba konferénsia nasionál FRETILIN iha Maubai (Vikeke) no iha loron 03 Marsu ho orientasaun husi membru Komité Sentrál FRETILIN sobrevivente na’in-rua Xanana Gusmão no Ma’Huno no konferensita sira hili membru CCF na’in-sia foun tan no foti desizaun importante lubuk ida, hodi libertasaun nasionál iha reorganiza luta iha territóriu tomak.
Husi konferensia ida-ne’e mak rezisténsia armada moris filafali iha ai-laran no povu hetan fali nia esperansa no halo mundu hakfodak.
Selebrasaun dahuluk ba Loron Nasionál Veteranu ne’e akontese iha 2017. Veteranu no kombante sira mak kompostu husi frente armada, klandestina no diplomátika.
Governu hili tema ba komemorasaun tinan ne’e mak “Unidade Diversidade ho nia Sentidu Patriotizmu”.
Notísia relevante: Governu prevee rihun $150 ba Loron Nasionál Veteranu
Jornalista: Nelson de Sousa
Editora: Maria Auxiliadora
