DILI, 03 Marsu 2026 (TATOLI)—Pesoál Servisu Migrasaun ne’ebé fasilita sidadaun Indonézia ida ho vistu overstay loron-ida hakat liu fronteira foin lalais ne’e hetan ona suspensaun.
“Pesoál ne’e agora ita suspende provizóriu para nia submete ba prosesu investigasaun kuandu hotu ona, se nia sala ita bele foti medida, se nia lae kontinua ba serbisu,” Ministru Interiór, Francisco da Costa Guterres, hato’o ba Jornalista sira hafoin partisipa iha serimónia Loron Nasionál Veteranu ba dala-IX ne’ebé hala’o iha edifísiu Konsellu Kombatente Libertasaun Nasionál (CCLN, sigla portugéz), Tersa ne’e.
Notísia relevante : Servisu Migrasaun forma ekipa investiga membru suspeitadu fasilita sidadaun Indonézia over stay
Ministru Interiór seidauk hatene suspensaun ne’e to’o bainhira tanba Servisu Migrasaun mak aplika suspensaun.
“Ha’u la hatene nia suspende ba loron hira, tanba nia Diretora Ezekutiva mak hatene, tanba agora sira iha Diretora Ezekutiva atu haree, tanba sira iha autonomia finanseira,” nia akresenta.
Governante ne’e dehan, relatóriu ba kazu ne’e kuandu hotu ona sira sei haruka mai hodi foti desizaun.
Ekipa Servisu Migrasaun no Provedoria Direitu Umanu no Justisa halo hela investigasaun.
“Ha’u labele adianta investigsaun ne’e lai. Husik investigsaun la’o lai ba, investigsaun ne’e besik hotu ona, ha’u atu hateten de’it katak Provedoria Direitu Umanus hala’o hela nia investigasaun ba kazu besik atu hotu depois sira mak sei hato’o ba ita-boot sira,” nia katak.
Jornalista : Natalino Costa
Editora : Julia Chatarina
