DILI, 04 Marsu 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, halo julgamentu ba krime omesidu simples no krime arma branka, ne’ebé mak komete husi arguidu na’in-tolu inisiál FCB, OCAdCG no LRCG, tanba taa kanek lezadu inisiál T, iha área Kristu Rei, Postu Administrativu Kristu Rei, Munisípiu Dili, iha tinan 2024.
Tribunál liuhusi Juíz Prosesu, José Quintão, lee sai iha audiénsia julgamentu, katak momentu ne’ebá arguidu na’in-tolu hamutuk ho kolega sira seluk hemu hamutuk tua iha área Kristu Rei, iha loron 19 Novembru 2024, iha oras maizumentus 01:00 madrugada.
Lezadu momentu ne’ebá hemu mós tua ho arguidu sira, hafoin lanu, lezadu hahú tolok arguidu sira hafoin lezadu fila tiha bá uma, enkuantu arguidu sira mós ho kondisaun lanu todan, fila mós bá uma ne’ebé mak lokaliza iha Metiaut.
Bainhira arguidu sira to’o iha Metiaut, lezadu ho nia grupu mós filafali mai iha Metiaut hodi tuda malu ho arguidu sira.
Arguidu LRCG uza fatuk ida hodi tuda kona kedas iha lezadu nia ibun, nune’e kauza lezadu hetan kanek no monu kedas ba rai.
Bainhira lezadu monu ona iha rai, arguidu OCAdCG uza liman hodi tuku kona kedas iha lezadu nia ulun kauza moras, hafoin arguidu FCB ho kondisaun lanu todan foti katana ida hodi taa kedas iha lezadu nia ulun nomós taa tan dala-ida iha kotuk laran, kauza lezadu hetan kanek no ran sai barak, hafoin lezadu mós monu kedas bá rai. Lezadu ho arguidu sira asalta malu tanba envolve iha grupu arte-marsiál.
Notísia relevante : Tribunál julga arguidu na’in-11 ba kazu hana mate Nuno iha Praia dos Coqueiros
Konsekuénsia husi arguidu sira-nia hahalok ne’e mak halo lezadu hetan kanek iha ibun, ulun, no kotuk laran tanba hetan asalta husi arguidu sira ho fatuk, liman no katana, nune’e halo lezadu hetan tratamentu iha ospitál nasionál.
Arguidu sira halo ho forma livre, deliberada, no konsiente hatene hela katak lori fatuk hodi tuda, uza liman hodi tuku no katana hodi taa ne’e bele halo kanek no hamate ema seluk nia vida (arguidu sira tau hamutuk sira-nia forsa) no kaer katana hodi taa arguidu sira iha pose ba arma no tuir Lei Penál bandu, maibé arguidu sira halo nafatin sira-nia hahalok ne’e hanesan meiu ou instrumentu ida-ne’ebé maka aptu no adekuadu. Arguidu sira mós hatene hela katak, sira-nia konduta ne’e tuir Lei Penál bandu.
Tanba ne’e, arguidu FCB, OCAdCG no LRCG hanesan ko-autoria materiál ba prátika krime omisidiu simples tuir artigu 138 CP, ho forma tentada tuir artigu 23 CP, no arguidu FCB hanesan mós autoria ba prátika krime arma branka, haktuir ba artigu 20 husi Lei nú. 5/2017, de 19 de Abrál, iha konkursu ba krime, tuir artigu 35 Kódigu Penál Timor-Leste.
Hatan ba akuzasaun ne’e, arguidu na’in-tolu nega faktu no konfesa ba Tribunál katak iha momentu ne’ebá lezadu mak provoka uluk arguidu sira hodi tuda malu iha Kristu Rei.
Arguidu sira deklara, iha momentu ne’e lezadu sira mós hamutuk ho nia kolega sira hemu tua no arguidu sira mós hamutuk ho nia kolega sira hemu hela mak lezadu sira provoka arguidu sira.
Iha audiénsia julgamentu ne’e, lezadu T deklara ba Tribunál katak lezadu bá Kristu Rei hodi la’o halimar tanba fatin ne’ebá ema barak bá no nu’udar fatin turizmu. To’o iha Kristu rei lezadu la hasoru ema ruma no la hemu tua ho nia kolega sira. Hafoin fila husi Kristu Rei derrepente arguidu sira mai atake lezadu iha motor leten.
Lezadu dehan, nia rasik la koñese arguidu sira ne’e no nunka halo problema sira. Arguidu sira tuda lezadu ne’e, lezadu iha motÓr leten no motor halai hela. bainhira arguidu tuda lezadu, nia monu tun kedas husi leten no raan fakar. Nune’e, lezadu la konsege haree arguidu sira-nia oin ne’ebé asalta nia.
Lezadu deklara, husi problema ne’e lezadu baixa iha Ospitál Nasionál Guido Valadares (HNGV) kuaze semana ida no kanek suku iha pontu lima, husi parte kotuk, ibun, inus, rentos, liman no nehan tanba nia nehan atu monu.
Hafoin rona tiha deklarasaun ne’e, Tribunál deside marka ba loron 10 Marsu tuku 09:00 dadeer hodi tama ba alegasaun husi parte Ministériu Públiku no parte Defeza nia.
Audiénsia julgamentu ne’e prezide husi Juíz koletiva, José Quintão no Jose Gonçalves no Jumiati Freitas, Ministériu Públiku reprezenta husi Prokuradór Luís Hernani Rangel da Cruz no arguidu na’in-tolu hetan asisténsia legál husi advogadu privadu na’in-ida.
Jornalista : Natalino Costa
Editora : Julia Chatarina
