DILI, 05 Marsu 2026 (TATOLI)-Diretór-Ezekutivu Centro Nacional Chega! Institutu Públiku (CNC, I.P), Hugo Maria Fernandes, informa katak konsulta públika kona-ba ezbosu Polítika Reparasaun no Lei Reparasaun sei hala’o tan iha munisípiu tolu hafoin Dili realiza ona konferénsia nasionál, ohin.
Hugo Fernandes dehan konsulta sobre polítika reparasaun ba vítima violasaun direitu umanu kometida entre 1974-1999 importante tebes, tanba konvida parte hotu atu fó sujestaun ruma ba iha implementasaun lei ne’e.
Nia relata katak antes halo konferénsia nasionál, CNC ho nia membru traballu sira halo uluk diskusaun internál ida hodi haree filafali polítika no ezbosu lei kona-ba reparasaun ne’e. Durante diskusaun, CNC ho membru traballu sira durante tinan ida konsege kompleta ezbosu rua mak Polítika Reparasaun no Lei Reparasaun nian.
“Tinan ida-ne’e ita sei halo konsulta públika dala-haat hahú ohin iha Dili, tuirmai sei realiza iha Aileu ne’e kobre sentrál no súl nian. Tuirmai iha Bobonaru no Vikeke. Planu konsulta públika ida-ne’e halo to’o fin Marsu tinan ne’e oinsá hetan ideia no rekomendasaun sira husi parte hotu hodi hametin liután politika no ezbosu ne’ebé iha ona”, Hugo Fernandes hateten iha CNC, ohin.
Tuir nia, konkluzaun sira sei fó sai bainhira konsulta públika hotu ona, tanba durante konsulta sei rona idea sira husi parte hotu.
Ministru Asuntu Kombatente Libertasaun Nasionál, Gil da Costa Monteiro ‘Oan Soru’, hateten kona-ba polítika reprasaun importante tebes tanba haree ba kotuk la fásil bainhira Timor-Leste atu hetan liberadade.
“Maibé sempre iha determinasaun povu nian katak nia transforma buat ne’ebé ema lafiar sai realidade. Ida-ne’e mai husi konkista boot no sakrifísiu, tanba buat ne’e la’ós oferta ka previléjiu”, Gil da Costa hateten bainhira halo abertura iha konferénsia nasionál konsulta públika kona-ba ezbosu Polítika Repasaun no Lei Reparasaun.
Nia hatutan katak konferénsia nasionál ne’e importante tanba halibur rekomendasaun sira hodi hadi’a ezbosu polítika no lei reparasaun ne’ebé iha ona, tanba ida-ne’e atu ko’alia kona-ba reparasaun ba vítima haree mós ba estatutu ne’ebé halo ona alterasaun iha 2024.
“Durante ne’e ita sempre ko’alia liafuan vítima ba sidadaun sira nu’udar timoroan. Sente liafuan ne’e naha todan ida ita tula hela ba ita-nia inan-aman sira, ita halo alterasaun ida hodi justifika iha Parlamentu Nasionál no aseita, sira rasik aprova ho liafuan ne’ebé la’ós vítima maibé patriota”, dehan.
Tuir governante ne’e, konsulta públika ne’ebé CNC organiza bele hetan ideia di’ak, konstrutiva hodi fó solusaun la’ós dala-ida de’it, maibé beibeik ho nune’e bele hadi’a nasaun ne’e liuhusi pensamentu ne’ebé ladún di’ak atu transforma sai di’ak.
Notísia relevante: CNC halo konsulta públika kona-ba Polítika Reparasaun
Jornalista: Arminda Fonseca
Editora: Maria Auxiliadora
