DILI, 09 Marsu 2026 (TATOLI)-Bankada Frente Revolusionária Timor-Leste Independente (FRETILIN) bolu atensaun Governu atu tau atensaun ba impaktu husi funu iha Médiu Oriente mai país.
Deputadu FRETILIN, José da Cruz, dehan funu ida-ne’e lori krize umanidade, maibé efeitu boot ba ekonomia mundiál nia, liuliu hasa’e folin ba komoditi importante sira hanesan ai-han, kombustivel, kria volatilidade ida maka’as iha merkadu finanseira no paraliza movimentu bens no servisu husi rejiaun ida ba rejiaun seluk.
Nia husu atu haree ba efeitu sira husi funu iha Médiu Oriente entre Estadu Unidu Amérika no Izraél hasoru Iraun ba Timor-Leste, tanba país ne’e ninia dependénsia maka’as ba importasaun.
“Daudaun ne’e, ita hotu akompaña hela funu ne’e, la hatene to’o bainhira mak bele hotu. FRETILIN hakarak husu ba Governu Dasiak oinsá nia planu emerjénsia no mitigasaun hodi hasoru krize ida-ne’e”, nia hato’o liuhusi reuniaun plenária Parlamentu Nasionál, ohin.
Nune’e presiza antisipa medida no estratéjia hodi asegura ai-han, presu konbustivel no enerjia no mós nesesidade primária nian durante períodu funu bainhira ho eskala kontinua mak sai piór.
Deputada Kongresu Nasionál Rekonstrusaun Timorense (CNRT), Cedelízia Faria dos Santos, dehan parte empreza Esperansa Timor Oan Unipessoal Lda., (ETO) nu’udar importadora ba kombustivel garante stock ba transporte públiku no privadu iha Timor-Leste to’o fulan haat nia laran, nune’e husu atu labele politiza kestaun referida.
Prezidente Parlamentu Nasionál, Maria Fernanda Lay, salienta katak Ministru Petróleu no Rekursu Minerál fó sai ona iha públiku kona-ba preokupasaun deputadu sira-nia.
“No ha’u foti kedas iha semana kotuk para ita haree situasaun rejionál, tanba ita sei iha posivelmente resesu mundiál, ne’ebé hakarak ka lakohi, klaru ita iha opsaun retifikativu [Orsamentu Retifikativu] ne’ebé Governu hatene halo atu responde, deputadu bele preokupa maibé rona fiskaliza”, dehan.
Notísia relevant: https://tatoli.tl/2026/03/06/eto-garante-estock-kombustivel-sufisiente-too-fulan-haat/
Jornalista: Nelson de Sousa
Editora: Maria Auxiliadora
