BAUKAU, 12 Marsu 2026 (TATOLI)—Autoridade Munisipál Baukau (AMB), Kinta ne’e, diskute ajenda rua kompostu husi toma-de-pose membru foun no diskute preparasaun vizita Primeiru-Ministru liuhusi reuniaun Konsellu Konsultivu Munisipál (KKM).
Prezidente Autoridade Munisipál (PAM) Baukau, Veneranda Eurico Lemos Martins esplika reuniaun Konsellu Konsultivu Munisipál realiza ho karakter estraordináriu tanba mandatu membru balun termina iha-ne’ebé kamada sosiál hotu tenke hola-parte tanba hala’o apresiasaun ba planu programa, aprova dokumentu importante sira-ne’ebé sei implementa no divulga sai ba komunidade iha munisípiu.
“Ajenda ohin rua de’it. Ida mak toma pose ba membru foun na’in-ualu no aprezentasaun matéria ne’ebé sei aprezenta vizita Primeiru-Ministru no Governu sentrál atu haree besik liután ba preparativu desentralizasaun administrativa,” Prezidente Autoridade Munisipál Baukau hateten iha Aula Apuramentu Munisipál Vila Nova, Baukau, Kinta ne’e.
Eis deputada ne’e relata membru foun na’in-ualu ne’ebé simu pose iha reuniaun kompostu konfisaun relijioza na’in-rua, asosiasaun defisiente na’in-ida no partidu polítiku asentu parlamentár na’in-haat iha-ne’ebé ho durasaun tinan-rua.
Nia salienta autoridade deside envolve Ema ho Defisiente (EhD) iha KKM tanba bazeia ba polítika iguadade jéneru liuliu rona ideia kona-ba dezenvolvimentu munisipál hanesan infraestrutura foku mós asesu asesivel ba Ema ho Defisiente.
Entretantu, Reuniaun Konsellu Konsultivu Munisipál realiza bazeia ba Dekretu-Lei Nú. 84/2023, alterasaun Dekretu-Lei Nú. 3/2016, loron 16 Marsu, kona-ba estatutu administrasaun munisipál ba autoridade munisipál no grupu tékniku interministeriál ba desentralizasaun administrativa.
Membru Konsellu Konsultivu Munisipál hamutuk 83 kompostu husi Prezidente Autoridade Munisipál, Sekretáriu Munisipál na’in-tolu nu’udar inerente, Konsellu Munisipál Kombatente Libertasaun Nasionál na’in-rua, setór privadu na’in-rua, grupu intelektuál na’in-rua, konfisaun relijiozu na’in-rua, organizasaun promotora igualdade jéneru na’in-rua, partidu polítiku asentu parlamentár no autoridade suku na’in-62.
Jornalista: Natalino Belo
Editór: Xisto Freitas da Piedade
