Komunidade afetadu na’in-rua ba espansaun pista aeroportu Komoro submete ona dokumentu

DILI, 13 Marsu 2026 (TATOLI)—Administrasaun Aeroportu no Navegasaun Aérea Timor-Leste, Empreza Públika (ANATL, E.P, sigla portugés) liuhusi Unidade Estudu Planeamentu no Infraestrutura, resjista komunidade afetadu na’in-rua ba espansaun pista Aeroportu Internasionál Prezidente Nicolau Lobato (AINPL) Komoro, submete ona dokumentu ba prosesu indemnizasaun.

Notísia Relevante: Empreza Waskita Karya mobiliza ekipamentu atu halo luan pista Aeroportu Komoro

Diretora Unidade de Estudu, Planeamentu no Infraestruturas, Antónia de Oliveira, hateten afetadu sira seluk ne’ebé seidauk submete dokumentu ne’e sira ladun hatene ninia razaun, maibé sira fó ona notifikasaun ba komunidade iha 15 Janeiru 2026.

“Ha’u lahatene razaun tanbasá mak sira lamai rejista, maibé ita nafatin prolonga tuir notikasaun Ministériu Justisa nian, durante loron 90. Signifika to’o loron 14 Abríl sei taka no sira-ne’ebé lakohi koopera, sira sei lakon sira-nia direitu ba ai-horis, uma no rai. Tanba ami sei prosesa bazeia ba dokumentu ne’ebé ami simu,” Diretora ne’e informa ba Agência Tatoli liuhusi telefónika, ohin.

Notifikasaun fó ona ba komunidade afetadu durante loron 90 atu hamamuk fatin no submete sira-nia dokumentu atu bele entrega ba Sekretáriadu Grande Projetu hodi halo prosesu indemnizasaun, maibé komunidade afetadu la koopera nafatin entaun despeza administrativa mak sei aplika.

“Prazu rejistrasaun iha ANATL ne’e liu tiha ona, maibé ami sei nafatin mantein ba deklarasaun iha notifikasaun despeza administrativa nian hodi kontinua simu prosesu rejistrasaun ba afetadu sira-ne’ebé kontinua submete sira-nia dokumentu to’o durante loron 90 nia laran. Tanba, ANATL mós envolve iha komisaun konjunta ba libertasaun rai no propriedde ba projetu dezenvolvimentu AIPNL,” nia dehan.

Nia relata, dokumentu ne’ebé afetadu sira submete sei elabora iha administrasaun komisaun nian, bainhira dokumentu kompletu hotu ona mak sei submete fali ba Sekretariadu Grande Projetu.

Entretantu, antes ne’e mós iha 20 Janeiru, Prezidente, Administrasaun Aeroportu no Navegasaun Aérea, Romualdo António Soares, hateten komunidade afetadu kuaze barak liu mak Governu indemniza ona no sei hela de’it afetadu na’in-57 mak sei disputa rai ho Governu, entaun ida-ne’e mak halo hela liña koordenasaun maibé atu dehan de’it katak afetadu na’in-19 mak indemniza ona no hela na’in 38 mak seidauk selu.

“Nune’e komisaun konjunta mantein loke atendimentu ba komunidade na’in-38 hodi submete sira-nia dokumentu atu prosesa ba indemnizasaun,” nia informa.

Nia haktuir, Ministériu Justisa mós fó ona notifikasaun ba komunidade afetadu sira iha loron 15 fulan-Janeiru 2026 ho prazu durante loron 90, nune’e husu ba komunidade afetadu sira bele koopera malu hodi habadak prosesu ne’e lalais, tanba rai ne’e afavór ba Governu signifika la’ós rai privadu.

“Bainhira komunidade la koopera mak ami sei entrega kompeténsia ne’e ba Governu atu halo eviksaun no sei la indemniza. Tanba ne’e, di’ak-liu koopera atu ami trata imi ho dignu, enkuantu Governu mak responsabiliza ne’e maneira sobu rahun maske imi la preparadu atu haloot sasán,” nia dehan.

Parte Aeroportu no Navegasaun Aérea Timor-Leste, Empreza Públika (ANATL, E.P, sigla portugés) loke rejistrasaun durante loron 15 ne’ebé hahú husi loron 20 Janeiru to’o 03 Fevereiru 2026.

Jornalista : Alexandra da Costa

Editór        : Cancio Ximenes