DILI, 16 Marsu 2026 (TATOLI)—Universitas Kristen Duta Wacana (UKDW) Jogjakarta, Indonézia, liuhosi Reitór Wiyatiningsih, hamutuk ho delegasaun husi kampus, hala’o enkontru ho alumni sira iha Dili, Domingu ne’e, hodi reforsa liután kolaborasaun edukasionál entre UKDW no Timor-Leste.
Tuir Reitór UKDW, Wiyatiningsih katak prezensa hosi antigu alunu sira UKDW nian hatudu universidade nia abilidade atu fó kontribuisaun loloos ba sosiedade no envolve ajenda importante oioin, inklui esplora oportunidade ba kolaborasaun edukasionál ho Governu no universidade sira iha nasaun ne’e.
Enkontru ne’e ho objetivu atu fó oportunidade ba kooperasaun akadémika, apoiu ba programa bolsu estudu ba Timor-Leste no UKDW, no mós kolaborasaun no kompetisaun no programa edukasionál sira.
“Ami hein katak liuhusi vizita UKDW nian sei hakbesik liután ba alumni sira iha Timor-Leste no ami-nia alumni sira iha papél ne’ebé boot tebes iha setór oin-oin iha Governu nian. Daudaun ne’e ami-nia alumni iha Timor-Leste hamutuk 100 maibé dadus sei kontinua atualiza,” nia hateten iha Restaurante Peskadór Bidau, Dili.
Nune’e, Wiyatiningsih hato’o ninia apresiasaun ba antigu alunu sira-ne’ebé maioria hosi fakuldade arkitetura, biolojia, informátika, teolojia, ekonomia no área sira seluk, ne’ebé hala’o ona papél signifikativu iha dezenvolvimentu Timor-Leste.
Iha biban ne’e, Adjuntu Reitór IV UKDW Wahju Satria Wibowo, apresia ba antigu alunu sira-ne’ebé maka inisia ona enkontru ne’e no hein katak relasaun entre antigu alunu sira ho kampus sei metin, maibé espera antigu alunu mós bele konsidera iha kampus.
Entretantu, antigu alunu UKDW alumni nian ne’ebé agora serbisu nu’udár Diretór Ezekutivu Steering Committee 25 (Steering Committee CO25), Eugénia Urania da Costa Correia, hateten sira-nia esperansa iha UKDW no institute iha Timor-Leste tenke kontinua serbisu.
“Ami haksolok tebes ho vizita estrutura reitoria nian mai Timor-Leste. Maski vizita ne’e la kle’ur, ami hein katak bele prodús kooperasaun ne’ebé maka’as, liliu iha akadémiku sira entre Timor-Leste ho UKDW,” nia tenik.
Partisipasaun iha atividade diskusaun ne’e antigu alunu besik 50. Enkuantu, Delegasaun UKDW ne’ebé marka prezensa kompostu husi Reitór Wiyatiningsih, Vise Reitór IV, Wahju Satria Wibowo, Dekanu Fakuldade Teknolojia Informasaun (FTI), Restyandito, no Vise Dekanu III Fakuldade Siénsia Negósiu no Sosiál (FBIS), Lucia Nurbani Kartika.
Delegasaun UKDW tuir planu sei hala’o vizita traballu ne’e hahú iha 16–17 Marsu 2026, ba instituisaun oioin, inklui Ministériu Ensinu Superiór, Siénsia no Kultura Timor-Leste, Universidade Nacional Timor Lorosa’e (UNTL), Universidade Katólika Nasionál Timor-Leste (UCT), Institutu Siénsia Filozofia Timor-Leste (ISFIT) no Universidade Dili (UNDIL).
Jornalista: Osória Marques
Editór: Xisto Freitas da Piedade
