OEKUSI, 23 Marsu 2026 (TATOLI) – Cristy Sword Gusmão apresia ho kompromisu polítika Autoridade Rejiaun Administrativa Espesiál Oekusi Ambeno (RAEOA) tanba alarga tan Programa Edukasaun Multi Língua (EMuLi) ba eskola 82 kobre Ensinu Báziku Sentrál (EBC, sigla portugés) 11 no Ensinu Pré-Eskolár (EPE) 17.
“Ha’u fiar katak manorin sira iha Oekusi, dalaruma ko’alia Tetun ho Portugés iha saladeaula, labarik sira lahatene atu hatan, tanba lian ne’ebé sira uza iha uma la’ós uza iha saladeaula. Tanba ne’e mak ha’u orgullu no apresia tebtebes, kompromisu polítiku husi lidér sira iha Oekusi, ne’ebé prontu ona atu implementa programa Edukasaun Multi Língua iha RAEOA tomak la’ós de’it, iha eskola públiku maibé privada sira mós aplika hotu, ha’u fiar katak, ho polítika no mudansa ida-ne’e, sei ajuda tebtebes labarik sira hotu, atu aprende lalais liu lee no hakerek,” nia hateten, bainhira observa Programa EMuLi ih EBF 30 Agostu Masin, ohin.
Programa ida-ne’e, hatudu ona liuhusi esperiénsia iha munisipíu tolu, katak, labarik sira-nia prosesu aprendizajén aselera dalarua kompara ho eskola públiku sira seluk.
Tanba ne’e, orgullu ho ekipa EMuLi inklui serbisu mentór lokál sira, tanba ajuda atu fó kapasitasaun no apoia konteúdu ba manorin sira, hodi bele implementa ho loloos metodolojia sira, serbisu maka’as, ho vontade di’ak husi manorin sira, tanba hanorin sira mak implementadór programa EMuLi.
“Entaun presiza serbisu maka’as, hanorin ho metodolojia no mós fó pedagojia ne’ebé sentradu ba alunu, presiza uza metodolojía modernu, la’os ida-ne’ebé uluk ita hetan liuhusi tempu okupazaun nian, ita presiza uza motodolojia foun, tanba agora Timor-Leste tama ona ASEAN, entaun labarik sira presiza iha autoridade sékulu 21, tanba ne’e dezafiu boot ba manorin sira, maibé ha’u fiar katak, ho metodolojía EMuLi, labarik sira sei sente katak, eskola fatin ne’ebé seguru no selebra sira-nia kultura no identidade rasik,” nia hateten.
Notísia relevante:MJ vizita eskola tolu ne’ebé aplika programa EMuLi iha Oekusi
Diretór Diresaun Rejionál Edukasaun no Solidariedade Oekusi, Vincêncio Cono, informa, Programa EMuLi, kobre hotu Ensinu Báziku Sentrál (EBC) sira hotu hamutuk 11 ho nia filiál sira, mai la define eskola privada ka públiku, tanba estudante sira presiza tebes programa ne’e, nune’e alunu sira bele tradús netik lian segundu hanesan Tetun no Portugés maibe hahú uluk ho lian-baikeno.
“La’ós hanorin baikeno iha eskola, maibé hanesan ponte ida atu hatene segunda língua no língua sira seluk, tanba Oekusi lian ida de’it, entaun polítika autoridade hakarak espanda ba eskola sira hotu 82, la’ós língua de’it maibé metodolojia ensinu mak ita opta liu, maske profesór ida hatene liu lian ofisiál rua ne’e, maibé presiza hatene mós lian-materna atu tradús ba alunu sira,” nia hateten.
Notísia relevante:ME ho parseiru dezenvolvimentu diskute Programa EMuLi
Programa EMuLI implementa ona iha eskola sira munisípiu tolu ho lian tolu diferente hanesan Galolen iha munisípiu Manatutu, Baikeno iha RAEOA no Fataluku iha munisípiu Lautein.
Jornalista: Abílio Elo Nini
Editór: Rafael Ximenes de A. Belo
