DILI, 27 Marsu 2026 (TATOLI)—Komandante Jerál Polísia Nasionál Timor-Leste (PNTL) nomeadu, Afonso dos Santos no Segunda Komandante PNTL, Natércia Martins, ofisialmente simu pose hosi Primeiru-Ministru, Kay Rala Xanana Gusmão, ba mandatu 2026-2029, iha Palásiu Governu, Sesta ne’e, liuhusi komemorasaun loron Polísia Nasionál Timor-Leste (PNTL) ba da-26.
Primeiru-Ministru Kay Rala Xanana Gusmão haktuir ohin komandante jerál foun fó reflesaun ida mai hotu-hotu katak ho dedikasaun no servisu sira husi komandante sira sesante mak ohin PNTL bele hamriik nu’udár seguransa Estadu nian.
“Ita buka hatene atu deskobre no haree saida mak halo di’ak ona no aat hodibele kurrije no konsolida Estadu Direitu Demokrátiku Timor-Leste. Tanba ne’e, ba polísia ita hotu iha kompromisu no responsabilidade atu hadi’a di’ak liután,” Primeiru-Ministru Kay Rala Xanana Gusmão dehan iha nia diskursu.
Nia apela ba Komandante Jerál no Segunda Komandante PNTL atu halo koordenasaun ho másima iha servisu PNTL nian.
“Ba Komandante Jerál PNTL presiza haree liubá seguransa rai-ne’e nian, oinsá maka bele asegura estabilidade ba ita-nia rai. Enkuantu, ba Segunda Komandante sei harre fali ba kooperasaun internasionál, haree mós ba ita-nia inkluzaun iha ASEAN,” Xanana dehan.
Nune’e mós ba lideransa foun Polisiá Nasionál Timor-Leste (PNTL ) ne’ebé ohin simu konfiansa, Xanana husu atu kontinua reforsa kapasidade institusionál, mantein orden públika no asegura seguransa ba sidadaun hotu iha Timor-Leste.
Partisipa iha serimónia toma pose kompostu husi membru PNTL, membru Governu, membru Parlamentu Nasionál, sosiedade sivíl inklui relijiozu sira no komunidade.
Jornalista: Osória Marques
Editór: Xisto Freitas da Piedade
