DILI, 31 Marsu 2026 (TATOLI)–Ministériu Edukasaun (ME) liuhusi Diresaun Nasionál Ensinu Sekundáriu Jerál, planeia taka klase paralelu no la autoriza ona atu dirijente eskola loke klase paralela iha eskola.
Diretór Nasionál Ensinu Sekundáriu Jeral, Benjamin Fernandes da Cruz, hateten Ministériu Edukasaun apoiu mak fasilidade hanesan meza no kadeira ba eskola sentru sira-ne’ebé akumula fali estudante sira husi eskola paralela ne’ebé taka.
“ME la autoriza atu iha tan klase paralela iha tinan-ne’e. Ita foka ba klase paralela ne’ebé antes ne’e sira taka no koloka hotu ona bá iha idaidak nia sentru, ne’ebé laiha ona eskola paralela. Ne’ebé, kada eskola iha sira-nia preparasaun ezame, sira ezame sei la difikulta. Karik fasilidade la sufisiente ami prontu fasilita. Ami sei fasilita tan kadeira no meza ba sira hodi hala’o prosesu aprendizajen,” Benjamin Fernandes dehan ba TATOLI iha nia kna’ar fatin, Vila Verde, Tersa ne’e.
Nune’e, diretór husu ba iha dirijente eskola sira atu halo relatóriu ba Ministériu Edukasaun, hodi aumenta fasilidade, karik iha kadeira meza menus.
Bazeia ba despaxu ministeriál katak klase paralela hitu ne’e nafatin taka, ne’e deside ona husi Ministériu Edukasaun nian, tanba la prenxe kritéria hanesan estudante menus.
Enkuantu, klase paralela no eskola sekundária jerál filiál, ne’ebé mak Ministériu Edukasaun taka mak hanesan klase paralela Kilik Uaigae Seisal, klase paralela Baguia Bua-Ua Lavateri, klase paralela Same Fahinehan, klase paralela Same Babulo, klase paralela Fernando La-Sama Fleicha, eskola filiál Baucau Kilik Uaigae Kaibada, klase paralela Olokasa Uagia-Ossu no klase paralela Ponilala-Ermera.
Responsavel hateten análize Ministériu Edukasaun nian, tuir Diploma Ministeriál nú. 23/2025, 13 Agostu, hatuun katak eskola hirak-ne’e la prenxe ona rekizitu atu kontinua eziste hanesan klase paralela ba eskola sira.
Diretór ne’e haktuir, hafoin diploma ministeriál tun, iha 14 Dezembru 2025, diresaun nasionál organiza kedan workshop ida, hodi disemina informasaun ba diretór munisípiu, superintendente no mós diretór eskola sira.
Jornalista: Osória Marques
Editór: Xisto Freitas da Piedade
