BAUKAU, 10 Abríl 2026 (TATOLI) – Ministru Administrasaun Estatal (MAE), Tomás do Rosário Cabral hateten Trinunál Rekursu liuhusi Kámara Konta mak sei kontrola ezekusaun orsamentu Autoridade Munisipál bainhira implementa podér lokál no desentralizasaun administrativa.
Instituisaun ne’ebé kontrola ezekusaun orsamentu podér lokál mak hanesan: Tribunál Rekursu liuhusi Kámara Konta, Inspetoria Jerál Estadu kada munisípiu no membru asembleia munisipál ka deputadu lokál sira.
Governante ne’e, esplika Governu sentrál kria sistema kontrolu ho kedas baze legál sira hodi kontrola orsamentu Autoridade bainhira implementa podér lokál no desentralizasaun administrativa iha-ne’ebé regulariza iha Lei númeru 16/2023, loron 31 maiu kona-ba finansa munisipál no hetan kontrola husi kamara konta husi nasionál.
“Sistema kontrola iha tolu hanesan kámara konta liuhusi online liuhusi portál munisipál, inspetór no asembleia munisipál,” Tomas Cabral hateten bainhira presta meet the press iha resintu Prezidente Autoridade Munisipál (PAM) Baukau, Vila Antiga, Sesta ne’e.
Tomas Cabral relata, alende ne’e Inspetoria Jerál Estadu kada munisípiu mós iha papél atu halo kontrola ba orsamentu munisipál, hodi halo auditoria kada tinan no futuru membru Asembleia Munisipál iha papél atu halo fiskalizasaun ba kada Serbisu Munisipál ne’ebé eziste iha munisípiu.
Nune’e, Governu sentrál husu atu Autoridade Munisipal tenke obrigadu publika Planu Asaun Anúal (PAA) inklui ezekusaun orsamentu iha portál nunisipál nune’e futuru hafasil prosesu kontrolu ezekusaun orsamentu.
“Ita-nia sistema ne’e kontrolu forte tebes, bainhira sistema internet kabu-sumarinu instaladu ona no kualidade rede di’ak sei fasilita Ajénsia nsia kontrola ho di’ak,” Tomás Cabral akresenta.
Politika implementasaun autonomia administrativa bazeia ba Konstitusaun Republika Demokratika Timor-Leste (KRDTL) artigu 72, katak estabelesementu podér lokál nune’e loke dalan ba kriasaun lei tolu hanesan lei númeru 23/2023, loron 10 novembru ne’ebé sei regulariza implementasaun podér lokál no desentralizasaun administrativa.
Lei númeru 16/2023, loron 31 maiu kona-ba finansa Munisipál sei regulariza maneira hotu utilizasaun orsamentu no lei númeru 22/2021 loron 4 novembru kona-ba elei saun Munisipál sei regulariza mekanismu eleisaun ba membru asembleia no Prezidente Autóridade Munisipál.
Entretantu, Lei númeru 9/2011, loron 17 Agostu kona-ba organika Kamara kontas deskreve funsaun institusaun ne’e atu halo fiskalizasaun legalidade despeza públiku no julgamentu ba konta estadu iha ambisaun fiskalizasaun, regulariza reseita no despeza púublika, apresia boa jestaun finanseira no efetividade ba infrasaun finanseiru.
Jornalista: Natalino Belo
Editór: Evaristo Soares Martins
