CCSI Bobonaru apoia EhD na’in-haat ho Fundu Auto-Sustentavel ba harii negósiu

BOBONARU, 24 Jullu 2026 (TATOLI) – Sentru Solidariedade Sosiál no Inkluzaun (CSSI) Delegasaun Territoriál Bobonaru, Ministériu Solidariedade Sosiál no Inkluzaun (MSSI), liuhusi Fundu Auto-Sustentavel kontinua fó apoiu ba ema ho defisiénsia na’in-haat hodi hametin sira-nia independénsia ekonómika liuhusi dezenvolvimentu negósiu ki’ik.

Diretór CSSI Bobonaru, Acácio Barreto, informa benefisiáriu na’in-haat ne’e mai husi postu administrativu Atabae, Kailaku, Bobonaru no Maliana.

“Benefisiáriu idaidak simu apoiu hamutuk $700 atu sosa sasán ne’ebé sira hili rasik hodi loke kioske no hahú sira-nia negósiu”, Acásio Barreto dehan ba jornalista sira, ohin.

Dirijente ne’e realsa katak programa apoiu auto-sustentavel ne’e la’ós dahuluk, tanba iha trimestre dahuluk Governu mós fó ona apoiu hanesan ba benefisiáriu na’in-lima. Iha trimestre daruak tinan ida-ne’e, CSSI aumenta tan apoiu ba ema na’in-haat.

Tuir Acásio Barreto, implementasaun programa ne’e depende ba dadus benefisiáriu ne’ebé haruka husi nivel munisípiu ba nasionál atu hetan aprovasaun antes disponibiliza apoiu ne’e.

“Trimestre dahuluk no daruak, ema ho defisiénsia benefisiáriu hamutuk na’in-sia simu ona apoiu. Governu sei kontinua programa ida-ne’e to’o trimestre dahaat tuir disponibilidade no aprovasaun orsamentu husi nivel nasionál”, nia informa.

Benefisiária ida husi suku Hataz, postu administrativu Atabae, Helena Soi Laca, kontente tebes ho apoiu ne’ebé simu tanba bele ajuda sustenta família no garante nia oan sira kontinua eskola.

“Ha’u kontente tebes ho programa ida-ne’e. Osan ne’ebé ha’u simu sei uza atu loke kioske no halo negósiu, nune’e bele sustenta ha’u-nia moris no fó ha’u-nia oan eskola”, nia hato’o.

Programa apoiu auto-sustentavel ne’e nu’udar parte husi esforsu Governu atu promove inkluzaun sosiál no hametin kapasidade ema ho defisiénsia atu moris ho independénsia liuhusi atividade ekonomika produtiva.

Jornalista: Sergio da Cruz

Editora: Maria Auxiliadora