Ekipa konjunta halo apreensaun ba viatura 200-resin iha bairru sira
DILI, 03 Agostu 2026-Ekipa konjunta ne’ebé lidera husi Sekretaria Asuntu Toponímia no Organizasaun Urbana (SEATOU) durante operasaun halo apreensaun ba karreta hamutuk 200-resin iha bairru sira iha Dili, tanba okupa espasu públiku no la kumpre Lei Orden Públika.
Prezidente Autoridade Munisípiu Dili, Francisco dos Santos, hatete operasaun ne’ebé hala’o iha tempu kalan iha loron hirak liubá hodi tama-sai bairru, asaun ne’e hodi fó xamada atensaun ba sidadaun sira bainhira sosa karreta no motorizada tenke iha ona parajen, nune’e labee prejudika fali ema seluk.
“Ita-boot sira haree, iha bairru sira kuandu ema moras, ambulánsia atu lori sai labele, tanba engarrafamentu iha ne’ebá”, nia dehan iha edifísiu Komandu PNTL Munisípiu Dili, ohin.
Nia realsa katak operasaun ne’e kontinua no pasu tuirmai husi parte autoridade observa hela espasu mamuk atu kria estasionamentu iha bairru sira no bainhira uza ba parazen tenke selu.
“Ita labele bandu ema nia direitu atu sosa, maibé sosa tenke iha parajen. Tanba agora balun sosa tiha ona, hakarak ka lakohi ita tenke kria kondisaun iha bairru laran”, dehan.
Ekipa konjunta ne’e kompostu husi SEATOU, Ministériu Transporte no Komunikasaun (MTK), liuhusi Diresaun Nasionál Transporte Terreste (DNTT), Autoridade Munisípiu Dili ho nia postu administrativu lima, Komandu Polísia Nasionál Timor-Leste (PNTL) Munisípiu Dili, liuhusi Unidade Tránzitu, no FALINTIL- Forsa Defeza Timor-Leste (F-FDTL).
Operasaun ne’e bazeia ba Dekretu-lei númeru 3/2024 kona-ba Ijiene Órden Públika, Dekretu-lei númeru 33/2025, loron 15 Outubru, kona-ba alterasaun dahuluk Dekretu-lei númeru 3/2017, Rejime Zona Estasionamentu Durasaun Limitada.
No Lei númeru 1/2025, 12 Marsu kona-ba Medida Tutela Legalidade Urbanístika, Dekretu-lei númeru 6/2003, loron 03 Abríl, kona-ba Kódigu Estrada, Dekretu-lei númeru 9/2022, loron 24 Fevereiru kona-ba Rejime Jurídiku ba Edifikasaun no Urbanizasaun.
Operasaun iha Dili ne’e hodi garante kumprimentu lei sira no organizasaun espasu públiku.
Notísia relvante: https://tatoli.tl/2026/07/22/ekipa-konjunta-hahu-operasaun-atu-garante-orden-publika-no-kumprimentu-regra-estasionamentu-iha-dili/
Jornalista: Nelson de Sousa
Editora: Maria Auxiliadora
