Tatoli no Akademia Yunnan aborda kooperasaun ba dezenvolvimentu no troka informasaun
DILI, 06 Agostu 2026 (TATOLI)—Ajénsia Notisioza Timor-Leste Tatoli, I.P hetan vizita husi Akademia Siénsia Sosiál Yunnan hodi aborda kona-ba kooperasaun entre parte rua iha futuru.
Prezidente Konsellu Diretivu Tatoli, I.P, Noémio Falcão, hateten vizita husi Akademia Siénsia Sosiál Yunnan Xina ne’e nia objetivu mak atu halo peskiza kona-ba dezenvolvimentu ne’ebé la’o iha Timór, liuliu ba setór agrikultura, relasaun umana no seluk tan.
“Sira mai Tatoli tanba sira akompaña ho di’ak informasaun sira ne’ebé Tatoli públika ne’e iha Xina, entaun sira mós tau ajenda katak vizita Tatoli. Ida-ne’e importante tebes ko’alia kona-ba relasaun di’ak entre rai sira ne’e. Parte informasaun nian, ha’u hanoin katak iha sorumutu ne’e parte rua mós ko’alia kona-na oinsá mak parte rua halo kooperasaun di’ak no futuru Tatoli bele vizita Yunnan halo estudu komparativu”, Noémio Falcão hateten iha Tatoli, ohin.
Tuir nia, ida-ne’e importante tebes tanba daudaun ne’e Tatoli mós halo kooperasaun ho mídia sira lubuk ida iha Xina, liuliu Komunikasaun Internasionál Guangxi, no sira seluk tan. Tanba ne’e, instituisaun sira ne’e importante tebes serbisu hamutuk ba futuru.
Peskizador Seniór iha Akademia Xineza ba Estudu Sudeste Aziátiku, husi Siénsia Sosiál Yunnan, Shulan Zhao, hateten objetivu mai vizita Tatoli ne’e mak hakarak hatene loloos kona-ba Tatoli ninia notísia ne’ebé fó sai kona-ba Xina no Timór nian, no futuru bele iha kooperasaun bele fó sai notísia ne’ebé importante liu entre nasaun rua ne’e nian.
“Ita-nia sorumutu ne’e ami hatene no haree kona-ba iha Tatoli ne’ebé fó sai imformasaun kredivel, no ami kontente hatene Tatoli. Ami espera katak futuru iba kooperasaun haree liu kona-ba ita-nia ema, kultura bele fahe ba malu entre Xina no Timor-Leste nian. Ami konvida Tatoli bele vizita Xina Yunnan, bele haree direta”, nia dehan.
Nia salienta katak kooperasaun ne’e importante tebes tanba Akademia Siénsia Sosiál Yunnan Xina ninia foku prinsipál tolu mak peskiza estudu Sudeste no Súl Aziátiku, atu sai sentru importante ba estudu rejionál, kooperasaun subrejionál, no peskiza kona-ba nasaun viziña sira; Etnolojia mak estuda grupu minoria étnika no kultura lokál sira iha Yunnan no rejiaun ne’ebé hale’u no; Dixiplina sira seluk mak kobre kampu sira Marxizmu, ekonomia, polítika sosiál, finansa, no governasaun.
“Ba Timor-Leste peskiza sira ne’e, antes ne’e ami halo ona maibé foin hetan informasaun ne’ebé uitoan liu, entaun ida-ne’e lori tempu haree didi’ak, ida-ne’ebé mak presiza duni”, konklui.
Jornalista: Arminda Fonseca
Editora: Maria Auxiliadora
