MAE hala’o avaliasaun daruak ba kondisaun mínima iha Baukau
BAUKAU, 11 Agostu 2026 (TATOLI)—Governu liuhusi Ministériu Administrasaun Estatál (MAE) hala’o avaliasaun faze daruak hodi avalia serbisu iha Autoridade Munisipál Baucau (AMB).
Diretór Jerál Dezenvolvimentu Lokál atuál supervaizór ba Segunda Avaliasaun Kondisaun Mínima, Virgílio da Costa, enkoraja dirijente AMB hotu atu serbisu maka’as no konsidera atividade avaliasaun referida importante tanba rezultadu servisu sei determina destinu munisípiu Baukau hakat bá implementasaun podér lokál no desentralizasaun administrativa.
“Husu ba autoriadade ho onestidade responde tuir servisu saida mak ita halo bazeia ba ita-nia TOR (Term of Reference) servisu nian,” Virgílio da Costa hateten iha salaun apuramentu Vila Nova, Baukau, Tersa ne’e.
Nia relata avaliasaun daruak ne’e hahú ho verifikasaun ba servisu munisipál tuir kada kompeténsia, servisu operasionál inklui konfirmasaun ba dokumentu ligadu sira no aleinde ne’e hala’o asinatura no mós termu entrega manúal no dokumentu eletróniku ba AMB.
Iha fatin hanesan, Prezidente Autoridade Munisipál (PAM) Baukau, Veneranda Eurico Lemos Martins, konsidera atividade referida nu’udár momentu ne’ebé importante ne’ebé hatudu dedikasaun hahú husi PAM to’o estrutura hotu simu responsabilidade tanba parte husi mákina Estadu nune’e konkretiza mehi ba podér lokál desentralizasaun administrativa.
“Espera katak ho segundu avaliasaun individúal ne’e, ita Munisipiu Baucau bele hetan valór hanesan primeira avaliasaun, ne’ebé lori ita iha nivel valór ne’ebé aas liu hotu munisipiu seluk,” Veneranda Lemos espresa.
Entretantu, atividade avaliasaun kondisaun mínima faze daruak ne’e hala’o durante loron-rua iha-ne’ebé loron dahuluk ekipa nasionál hala’o avalia ba serbisu PAM, Sekretáriu Munisipál na’in-tolu, administradór postu administrativu na’in-ualu no Diretór AMB.
Enkuantu, loron daruak kontinua ho Diretór Serbisu Munisipál no operasionál sira antes kontinua ho observasaun no verifikasaun direta iha terrenu.
Rekorda katak rezultadu avaliasaun kondisaun mínima dahuluk ne’ebé fó-sai Munisípiu Baukau hetan valór muito bom no hetan rekomenda atu AMB hadi’a serbisu sira hanesan planeamentu no monitorizasaun, jestaun finanseira no aprovizionamentu, kontratasaun públika, monografia no demografia.
Aleinde ne’e, husu atu inisiu tinan-ne’e Munisípiu Baukau tenke aprezenta planu orsamentu no aprovizionamentu atu hetan aprovasaun husi superiór tutelada, ezekusaun orsamentu tuir kategoria, planu asaun anuál, planu investementu munisipál no planu aprovizionamentu hotu tenke publika iha portál munisipál.
Seluk, Diretór Serbisu Munisipál tenke submete relatóriu atividade mensál ba PAM, PAM tenke atribui orden ba Ajénsia Fiskalizasaun Munisipál, haforsa koordenasaun serbisu husi AMB to’o aldeia, presiza halakon egoista iha serbisu fatin no nesesita komunikasaun inklui koordenasaun di’ak.
Jornalista: Natalino Belo
Editór: Xisto Freitas da Piedade
