ETCCC – SEKOMS lansa Filme Jesus iha lian Tetun
DÍLI, 22 Agostu 2026 (TATOLI) – Organizasaun East Timor Crusade for Christ (ETCCC), hamutuk ho Sekretaria Estadu Komunikasaun Sosiál (SEKOMS), Sábadu ne’e lansa ofisialmente Filme Jesus iha lian Tetun, iha Salaun Komisaun Nasionál Eleitorál (CNE), Kolmera, Dili.
Diretór Nasionál ETCCC, Yoasafat Carlos, dehan tradusaun no ajustamentu filme ne’e ba lian Tetun hanesan esforsu ida atu hafasil asesu komunidade ba mensajen Evanjellu no istória moris Jesus Kristu.
Nia dehan filme ne’e bele ajuda ema barak komprende di’ak liután kona-ba Jesus Kristu nia hanorin no Biblia, liuhusi meiu audiovisuál ne’ebé fasil atu haree no komprende.
“Filme Jesus ne’e ita halo dublajen no tradús ba lian Tetun atu nune’e bele hasae asesu populasaun ba mensajen Evanjellu no istória moris Jesus Kristu, hodi hakbesik ema sira ba Maromak liuhusi nia Oan, Jesus Kristu, nia domin,” Yoasafat hateten ba jornalista sira iha Salaun CNE, Kolmera, Dili.
Nia hateten Filme Jesus iha lian Tetun mos fó oportunidade ba ema hotu, inklui sira ne’ebé seidauk iha asesu ba Biblia ka edukasaun relijioza formal, atu aprende kona-ba Jesus Kristu nia moris no nia hanorin.
Tuir Yoasafat, inisiativa ne’e la’ós de’it atu fasilita asesu ba konteudu relijiozu, maibé mós atu valoriza no promove uza lian Tetun nu’udar lian ofisiál no parte importante husi identidade nasionál Timor-Leste.
“ETCCC espera katak liuhusi distribuisaun no exibisaun filme ne’e iha komunidade, igreja, eskola no grupu juventude sira, filme ne’e bele fó inspirasaun ba ema barak atu reflete kona-ba valór domin, dame no solidariedade iha sosiedade Timor-Leste,” nia dehan.
Iha okaziaun ne’e, Sekretáriu Estadu Komunikasaun Sosiál, Expedito Loro Dias Ximenes, apresia ETCCC nia kontribuisaun iha dezenvolvimentu konteudu iha lian nasional.
Expedito dehan komunikasaun iha lian Tetun importante tebes atu asegura katak informasaun no mensajen sira bele to’o ba sidadaun sira iha parte hotu-hotu iha Timor-Leste.
“Hodi Governu Konstitusionál nia naran, hau agradese ba ETCCC ne’ebé lansa ona Filme Jesus ho ita-nia lian rasik, Tetun, hodi hafasil komunidade komprende Jesus Kristu nia liafuan sira no hametin valór morál, edukasaun no espiritualidade iha Timor-Leste,” nia dehan.
Nia enfatiza katak filme ne’e bele sai nu’udar meiu komunikasaun efetivu ida atu transmite valór morál, edukasaun no espiritualidade, liuliu ba jerasaun foun.
Tanba ne’e, Governu sei kontinua apoia inisiativa sira ne’ebé promove uza lian Tetun no kontribui ba hametin unidade nasionál.
Durante serimónia lansamentu, partisipante sira hetan oportunidade atu haree parte husi Filme Jesus iha lian Tetun, ne’ebé tradúz no adapta atu fasilita komprensaun audiénsia lokál.
Filme ne’e relata kona-ba Jesus Kristu nia moris, peregrinasaun, nia mate no resureisaun bazeia ba Evanjellu tuir Lukas.
Serimónia lansamentu ne’e partisipa mós husi reprezentante Governu, líder relijiozu, parseiru dezenvolvimentu no akadémiku sira iha Timor-Leste.
Jornalista: Camilio de Sousa
Editór: Filomeno Martins
