Xanana kansela viajen voo Indonézia-Dili tanba erupsaun vulkániku foho Anak Krakatau
DILI, 07 Setembru 2026 (TATOLI)–Primeiru-Ministru, Kay Rala Xanana Gusmão ho delegasaun, ohin loron seidauk bele fila mai Dili Timor-Leste, tanba perturbasaun kalohan ((abu-abu) vulkániku husi erupsaun vulkániku Foho Anak Krakatau iha Indonézia, entaun voo hotu-hotu iha Aeroportu Internasionál Soekarno-Hatta Jakarta kansela.
Tuir informasaun ne’ebé Agência Tatoli asesu iha ajenda ofisiál Primeiru-Ministru informa katak, PM Xanana Gusmão ho ekipa delegasaun sei kontinua hela iha Indonézia tanba aviaun seidauk bele halo viajen, tanba impaktu husi abu vulkániku ne’ebé to’o ona Jakarta, inklui área aviasaun besik Aeroportu Internasionál Soekarno-Hatta.
Perturbasaun ne’e akontese nu’udar impaktu husi série erupsaun Foho Anak Krakatau ne’ebé hahú kedas ona iha loron 04 Setembru 2026.
Nune’e mós, tuir Instituisaun (Badan) Meteorolojia, Klimatolojia, no Geofízika (BMKG) Indonézia hateten katak sira aumenta monitorizasaun durante oras 24 ba atividade Foho Anak Krakatau, inklui impaktu ba atmosfera, aviasaun no kondisaun tasi iha área Estreitu Sunda.
Tuir análize husi imajen satélite BMKG iha Domingu (06/09) tuku 8h00 dadeer, iha klaster rua husi distribuisaun vulkániku ne’ebé taka área Banten, DKI Jakarta, Jawa Barat to’o Bengkulu. vulkániku ne’e lori husi anin iha altitudi oioin, nune’e bele afeta rota aviaun.
BMKG mós rejista katak estasaun Meteorolojia Soekarno-Hatta fó ona avizu sedu ba aviasaun ka Significant Meteorological Information (SIGMET) dahuluk, molok erupsaun iha loron 04 Setembru, besik tuku 23h23 kalan. To’o loron 06 Setembru, SIGMET hamutuk 18 mak sira fó ona ho periódiku atu apoia seguransa navegasaun iha ár.
Erupsaun ne’e mós sai atensaun tanba foho Anak Krakatau lokaliza iha área Estreitu Sunda. Maibé, tuir monitorizasaun multi-sensor husi Indonesia Tsunami Early Warning System (InaTEWS) to’o loron 06 Setembru tuku 07h30 dadeer, BMKG la hetan anomalia iha nivel tasi ne’ebé hatudu indikasaun tsunami tanba série erupsaun ne’e.
Prezensa Xanana iha Indonézia tanba iha agenda kona-ba fronteira marítima
Xanana Gusmão nia prezensa iha Indonézia nu’udar parte husi vizita servisu ne’ebé hahú husi loron 29 Agostu 2026, ho ajenda bilaterál balun, inklui prosesu atu rezolve delimitasaun fronteira marítima entre Timor-Leste no Indonézia.
Negosiasaun ronda dahuluk kona-ba fronteira marítima entre nasaun rua hahú iha Agostu 2025 iha Dili, ho aprovasaun prinsípiu orientadór sira ba prosesu negosiasaun. Ronda daruak hala’o iha Yogyakarta iha Dezembru 2025 no ronda datoluk iha Singapura iha Abríl 2026.
Ajenda seluk iha Indonézia mós inklui vizita bá Coral Triangle Center (CTC) iha Sanur, Bali; partisipa iha misa atu fó omenajen ba líder Igreja Katólika (preladu) na’in tolu ne’ebé sira-nia restu mortál atu translada ba Timor-Leste.
Aleinde Primeiru-Ministru mós halo vizita amizade ba rezidénsia privadu Eis Prezidente Indonézia, Joko Widodo, iha Solo, Jawa Tengah, iha loron 4 Setembru 2026.
Jornalista : Alexandra da Costa
Editór : Cancio Ximenes
